بریکنگ نیوز
Home / پاکستان / طارق فاطمی کا وزیراعظم کے نام الوداعی خط میں

طارق فاطمی کا وزیراعظم کے نام الوداعی خط میں


اسلام آباد۔ سابق معاون خصوصی طارق فاطمی نے وزیراعظم نواز شریف کے نام الوداعی خط میں اپنے اوپرڈان لیکس کے حوالے سے لگنے والے تمام الزامات کو بے بنیاد قرار دے دیا۔ہیڈکوارٹرز کے تمام افسران کے نام لکھے گئے اس خط میں طارق فاطمی کا کہنا تھا کہ ‘میں خود پر لگائے جانے والے تمام الزامات کو مسترد کرتا ہوں، یہ الزامات ایسے شخص کے لیے تکلیف کا باعث ہیں جو پانچ دہائیوں سے پاکستان کی خدمت کررہا ہو ۔ان کا مزید کہنا تھا کہ ان سالوں میں مجھے قومی سلامتی کے معاملات سے جڑے کئی حساس معاملات کو دیکھنا پڑا جن میں کچھ بہت اہم معلومات سے آگاہی بھی شامل تھی ۔

اپنے خط میں ان کا مزید لکھنا تھا کہ میرے ساتھ تعاون کے لیے میں سب کا شکریہ ادا کرتا ہوں ۔اپنے خط میں وزیراعظم کے سابق معاون خصوصی نے مزید کہا کہ فارن سروس سے میرا تعلق قائم رہے گا اور کسی بھی قسم کے تعاون کے لیے میں ہمیشہ موجود رہوں گا۔پاکستان فارن مشن کے ساتھیوں سے مخاطب ہوتے ہوئے طارق فاطمی نے کہا کہ مجھے ممتاز سفارت کاروں کے ماتحت کام کرنے کا اعزاز بھی حاصل ہوا، جنہوں نے میری صلاحیتوں پر بھروسہ کیا ۔انہی ساتھیوں کا شکریہ ادا کرتے ہوئے ان کا مزید کہنا تھا کہ پاکستان، سفارت کاری اور فارن سروس فیملی سے میرا تعلق ہمیشہ قائم رہے گا ۔

واضح رہے کہ وزیراعظم کے پرنسپل سیکریٹری فواد حسن فواد کے دستخط سے جاری ہونے والے اعلامیے کے مطابق وزیراعظم نواز شریف نے انگریزی روزنامے کی خبر کے معاملے پر بنائی گئی انکوائری کمیٹی کی سفارشات کی منظوری دی تھی جبکہ ان ہی کی روشنی میں یہ اقدامات اٹھائے گئے تھے۔