بریکنگ نیوز
Home / پاکستان / پیسہ کمانے کی سیاست پر لعنت بھیجتاہوں ٗ اسد قیصر

پیسہ کمانے کی سیاست پر لعنت بھیجتاہوں ٗ اسد قیصر

پشاور ۔ سپیکر خیبر پختونخوا اسمبلی اسدقیصر نے کہا ہے کہ سیاست خدمت اور عبادت کیلئے کر تاہوں کمیشن خوری اور پیسہ کمانے کی سیاست پر ہزار بار لعنت بھیجتاہوں ۔آئندہ الیکشن کے بعد صوبوں سمیت مرکز میں بھی پاکستان تحریک انصاف کی حکومت قائم ہو گی ۔مولانا فضل الرحمان عوام کو بتائیں کہ انہوں نے اپنے پانچ سالہ ایم ایم اے کی حکومت کے دوران اور گذشتہ حکومت میں پیپلز پارٹی کے اتحادی ہونے کے باعث کونسی اسلامی قانون سازی کی ہے ۔ جبکہ پاکستان تحریک انصاف کی صوبائی حکومت نے صوبہ میں سودی کاروبارکی لعنت کے خاتمے کیلئے قانون سازی کرکے سود خوروں کو قابل گرفت بنایا ۔سرکاری سکولوں میں چھٹی جماعت تک ناظرہ قرآن اور چھٹی جماعت سے دسویں کلاس تک ترجمہ قرآن کا نظام وضع کیا ۔

اسی طرح ختم نبوت کے باب کو تعلیمی نصاب کا حصہ بناکر اپنا اسلام پسندی کا ثبوت دیا ۔انہوں نے ان خیالات کا اظہار ضلع صوابی کے موضع ڈوڈھیر میں پبلک ہیلتھ انجینئرنگ کے تعاؤن سے 84لاکھ روپے کی لاگت سے تعمیر شدہ آبنوشی کی سکیم کا افتتاح کرتے ہوئے کیا ۔جس سے پانچ ہزار گھرانوں کو صاف پانی کی فراہمی ممکن ہو گی اس موقع پر انہوں نے گاؤں کی گلیوں اور راستوں کی پختگی کے لئے 30لاکھ روپے دینے کا اعلان کیا ۔سپیکر نے کہا کہ میں پورے این اے ۔13کا نمائندہ ہوں اور میرے نزدیک علاقے کا ہر گاؤں برابر اہمیت کا حامل ہے میری کوشش ہے کہ ہر گاؤں میں مساوی ترقیاتی منصوبوں کا اجراء کیا جائے ۔انہوں نے کہا کہ این اے ۔13کے عوام کو گیس کی فراہمی کے ضمن میں مرکزی حکومت کی سردمہری کے باعث بالاآخر پشاور ہائی کورٹ میں کیس دائر کیا اور اللہ کی مدد ونصرت کے باعث ہائی کورٹ سے کیس جیت کر علاقے کو سوئی گیس کی فراہمی کی منظوری حاصل کی ۔ انشاء اللہ جلد ہی پورے این اے 13کو مرحلہ وار سوئی گیس کی فراہمی شروع کردی جائے گی۔

جس سے عوام کی ایک اہم محرومی کا خاتمہ ہو جائے گا ۔انہوں نے کہا کہ مسلم لیگ کے کچھ لوکل لیڈر گیس کی فراہمی میں رکاؤٹیں ڈال رہے ہیں لیکن انہیں ناکامی کا منہ دیکھنا پڑے گا اور عوام کو سوئی گیس مل کر رہے گی ۔انہوں نے کہا کہ ہم علماء کرام کی قدر کرتے ہیں جو اسلام سے محبت کرتے ہیں لیکن افسوس کہ مولانا فضل الرحمان اسلام کی بجائے اسلام آباد سے محبت کرتے ہیں اور حالات جیسے بھی ہوں وہ حکومت میں رہنے کو ترجیح دیتے ہیں انہوں نے کہا کہ اللہ کی لاٹھی بے آواز ہے سپریم کورٹ نے میاں صاحب کو نااہل قراردیکر کرپشن کے تابوت میں کیل ٹھونکاہے ۔انہوں نے کہا کہ آئندہ مسلم لیگ ن کا ٹکٹ شرم کے مارے کوئی لینے والابھی نہیں ہوگا۔ سپیکر نے کہا کہ عوام آئندہ الیکشن میں خود فیصلہ کریں کہ ان کو اپنے علاقے کا نمائندہ بہتر لگتاہے یا دوسرے علاقوں سے آیا ہوا نمائندہ ۔

اور آئندہ ووٹ کا رکردگی کی بنیاد پر دیں۔انہوں نے کہا کہ علاقہ میں سڑکوں ،تعلیمی اداروں ،صحت کے اداروں ،آبنوشی سکیموں ،زرعی ٹیوب ویلوں وغیرہ کا جال بچھادیا گیا ہے ۔کچھ سکیمیں پایہ تکمیل تک پہنچ گئی ہیں اور باقی جلد ہی پایہ تکمیل تک پہنچ جائیں گی ۔جس کے بعد علاقہ میں ایک مثبت انقلاب برپا ہوگااور عوام کی محرومیوں کا خاتمہ کرتے ہوئے انہیں تمام بنیادی سہولیات کی فراہمی ممکن ہو جائے گی ۔انہوں نے کہا کہ عوام مسائل کی نشاندہی کریں، میری پوری کوشش ہوگی کہ ان مسائل کا حل تلاش کیاجاسکے۔