بریکنگ نیوز
Home / پاکستان / شریف خاندان کی 5رکنی بینچ تشکیل کی استدعا منظور

شریف خاندان کی 5رکنی بینچ تشکیل کی استدعا منظور


اسلام آباد۔سپریم کورٹ نے پاناما کیس فیصلے پر نواز شریف اوران کے بچوں کی نظر ثانی اپیل کے لیے 5رکنی بینچ تشکیل دینے کی استدعا منظورکر تے ہوئے سماعت آج (بدھ)تک ملتوی کردی ۔ پانچ رکنی بینچ کی تشکیل کے لیے کیس چیف جسٹس کو بھیج دیا گیا ۔سابق وزیراعظم کے بچوں کے وکیل کا کہنا تھا تین رکنی بینچ سے ریلیف مل بھی جائے تو 5رکنی بینچ کا فیصلہ برقرار رہے گا۔منگل کوسپریم کورٹ میں پاناماکیس فیصلے پر نواز شریف اوران کے بچوں کی نظر ثانی اپیل کی جسٹس اعجاز افضل خان کی سربراہی میں 3رکنی بینچ نے سماعت کی۔

سماعت کے آغاز پر سابق وزیراعظم کے بچوں کے وکیل سلمان اکرم راجا نے کہا کہ جو اس بینچ کے ممبر ہی نہیں تھے انہوں نے بھی فیصلہ سنایا۔5رکنی بینچ کے فیصلے کیخلاف نظر ثانی اپیل پہلے سنی جائے ،جسٹس اعجاز افضل نے کہا کہ آپ کی نظر ثانی اپیل میں سارے گراؤنڈ3 رکنی بینچ کے فیصلے کیخلاف ہیں۔پاناما کیس میں اکثریتی فیصلہ 3 رکنی بینچ کا تھا۔سلمان اکرم راجا کا کہنا تھا کہ میں نے نظر ثانی درخواست میں فیصلے کے خلاف بنیادی سوالات اٹھائے ہیں۔

3رکنی بینچ کا فیصلہ 5رکنی بینچ کے فیصلے میں ضم ہوگیا تھا،3رکنی بینچ سے ریلیف مل بھی جائے تو 5رکنی بینچ کا فیصلہ برقرار رہے گا،استدعا ہے 5رکنی بینچ نظرثانی اپیل کی سماعت کرے۔سلمان اکرم راجا نے موقف اختیار کیا کہ 28 جولائی کو فیصلہ 5 رکنی لارجر بینچ نے دیا تھا اس لیے نظر ثانی اپیل بھی 5 رکنی بینچ میں لگائی جائے اور اس کے لیے 5 رکنی لارجر بینچ تشکیل دیا جائے۔عدالت نے5 رکنی بینچ کی تشکیل کی استدعا منظورکرلی، کیس کی سماعت آج (بدھ)تک ملتوی کردی گئی۔