بریکنگ نیوز
Home / پاکستان / دہشتگردی کیخلاف پوری دنیا کی جنگ لڑرہے ہیں ، وزیراعظم

دہشتگردی کیخلاف پوری دنیا کی جنگ لڑرہے ہیں ، وزیراعظم

مری ۔ وزیراعظم شاہد خاقان عباسی نے کہا ہے کہ جمہوری اقدار کو مضبوط کرنا ہماری اولین ترجیح ہے‘ پاکستان کو چیلنجز کا آج سامنے ہے پھر بھی ہم ترقی کررہے ہیں‘ جمہوریت مضبوط ہونے سے ہی ملک کے مسائل حل ہوتے ہیں‘ پاکستان کوئی عام ملک نہیں بلکہ ایک ایٹمی قوت ہے‘ پاکستان دہشت گردی کے خلاف دنیا کی سب سے بڑی جنگ لڑرہا ہے‘ پاکستان کے دو لاکھ سے زائد جوان دہشت گردی کے خلاف پوری دنیا کی جنگ لڑرہے ہیں‘ کامیابی صرف مال یا کسی عہدے کے حاصل کرنے سے حاصل نہیں ہوتی۔

لارنس کالج نے اچھے انسان اور لیڈر پیدا کئے ہیں‘ کالج میں ہیڈ بوائے اور پریفیکٹ بننا ایک اعزاز کی بات ہوتی ہے‘ اساتذہ کے سکھائے گئے اصول آج بھی میرے لئے مشعل راہ ہیں۔ جمعرات کو لارنس کالج گھوڑا گلی کے 157 ویں یوم تاسیس کے موقع پر تقریب سے خطاب کرتے ہوئے انہوں نے کہا کہ میں نے پرنسپل صاحب سے اجازت لی ہے کہ اردو میں تقریر کرنے دی جائے تمام طلباء کو مبارکباد دیتا ہوں کہ آپ کی تعلیم کا ایک اور سال مکمل ہوا۔

آپ سے زیادہ آپ کے والدین کو مبارکباد دیتا ہوں جن کی محنت سے آپ یہاں موجود ہیں۔ میرے لئے یہ اعزاز ہے کہ میں آج آپ سے مخاطب ہوں کیونکہ آج سے 42 سال پہلے میں آپ کی جگہ پر کھڑا تھا اور وہ میری زندگی کا بہترین دن تھا۔ آپ پاکستان کے چند بہترین اداروں سے تعلیم پاچکے ہیں۔ اس کالج نے بہت سے نمایاں افراد پیدا کئے جن میں کچھ سیاست میں گئے‘ فوج میں یا دیگر شعبوں میں گئے اس کالج نے اچھے انسان پیدا کئے ہیں۔

ان طلباء کی تعداد بہت زیادہ نہیں ہے جو لوگ آج آپ کے ساتھ کھڑے ہیں ان کو دیکھ لیں یہ آپ کی زندگی کے بہتریند وست ہوں گے جو عمر بھر رہے گی۔ کالج میں ہیڈ بوائے اور پریفیکٹ بننا ایک اعزاز ہوتا ہے جن طلباء نے یہ اعزاز حاصل کیا ان کو مبارکباد دیتا ہوں۔ اس سال جو قائد اعظم شیلڈ کے فاتح کو بھی مبارکباد دیتا ہوں ہمارے زمانے میں تعلیم پر کم اور کھیل پر زیادہ توجہ دی جاتی تھی اس کالج سے میری خوشگوار یادیں وابستہ ہیں۔

یہ آپ کی یادیں عمر بھر ساتھ رہیں گی۔ آپ کی یادیں کتابوں کی نہیں اس کھیل کے میدان کی ہوں گی جہاں آپ کی تربیت ہوتی ہے اس کالج کا پاکستان میں بڑا کردار ہے اس کالج نے لیڈر پیدا کئے ہیں۔ لارنس کالج ایکسیلینسکا نام ہے اساتذہ کے سکھائے گئے اصول آج بھی میرے لئے مشعل راہ ہیں آپ کے اساتذہ کی یادیں آپ کے ساتھ رہیں گی یہی لوگ کل آپ کے دوست ہوں گے۔ آپ کا فرض ہے کہ ساری زندگی ان کی عزت کریں کالج کے پرنسپل نے اس ادارے کے وقار اور عزت میں اضافہ کیا ہے۔ انہوں نے کہا کہ آج پاکستان کو چیلنجز بھی درپیش ہیں لیکن ہم ترقی بھی کررہے ہیں۔

ہمارا شمار دنیا کے ان ممالک میں ہوتا ہے جن کو دنیا عزت کی نگاہ سے دیکھتی ہے اور جن کا ایک مقام ہے دنیا میں بجلی کے مسائل تھے جو حل ہوتے۔ مسائل حل ہوتے رہیں گے لیکن جس ملک میں جمہوریت پنپتی ہے اسی ملک کے مسائل حل ہوتے ہیں۔ آج جمہوری اقدار کو مضبوط کرنا ہماری اولین ترجیح ہے اور جمہوریت کی مضبوطی سے ملکی مسائل کو حل کیا جائے۔ ہم عام ملک نہیں بلکہ ایک ایٹمی قوت ہیں جس نے اپنے وسائل اور محنت سے یہ طاقت حاصل کی ہے۔ ہم ملک کا دفاع کرنا جانتے ہیں آج دنیا کی سب سے بڑی دہشت گردی یک خلاف جو جنگ ہے وہ پاکستان لڑرہا ہے۔

ہمارے دو لاکھ سے زائد جوان دہشت گردی کے خلاف پوری دنیا کی جنگ لڑرہے ہیں۔ ہزاروں شہادتیں ہوئی ہیں اور قربانیاں دی گئی ہیں۔ شہیدوں نے پاکستان کے لئے اپنا سب کچھ قربان کیا اور آج بھی کررہے ہیں میں امید کرتا ہوں جو تعلیم و تربیت آپ نے یہاں حاصل کی وہ آپ کے ضرور کام آئے گی۔ کامیابی صرف مالی نہیں ہوتی یا کسی عہدے سے نہیں آتی اس کالج نے اچھے انسان اور محبت وطن پاکستانی پیدا کئے ہیں۔ میں کالج کی خدمت کے لئے ہر وقت حاضرہوں۔ دو سو ملین روپے کالج کی ترقی اور تعمیر کے لئے مہیا کئے جائیں گے۔ کالج کے اساتذہ مطمئن ہوں گے تو طلباء کی اچھے انداز میں تربیت کرسکیں گے۔