بریکنگ نیوز
Home / پاکستان / بلیک فرائیڈے منانے پر پابندی کیلئے درخواست دائر

بلیک فرائیڈے منانے پر پابندی کیلئے درخواست دائر


اسلام آباد۔ بلیک فرائیڈے منانے پر پابندی کے لئے ہائی کورٹ میں درخواست دائر کردی گئی ہے۔جمعرات کو اسلام آباد ہائی کورٹ میں بین الاقوامی سطح پر معروف سیل میلے بلیک فرائیڈے پر پابندی عائد کرنے کے لئے درخواست کی سماعت ہوئی، مدعی نے اپنی درخواست میں وفاق کو بذریعہ سیکرٹری اطلاعات، سیکرٹری مذہبی امور، چیئرمین پیمرا، ڈسٹرکٹ مجسٹریٹ، چیف کمشنر اور چیئرمین اسلامی نظریاتی کونسل کو فریق بنایا ہے۔

درخواست کی ابتدائی سماعت میں موقف اختیار کیا گیا کہ اللہ نے جمعہ کو تمام دنوں کا سردار کہا ہے، لہذا اس دن کو بلیک فرائیڈے کہنا جرم ہے۔ لغت کے مطابق بلیک فرائیڈے کا مطلب منحوس دن یا یوم سیاہ بنتا ہے ا س لئے عدالت آج جمعہ 24 نومبر کو پاکستان میں بلیک فرائیڈے منانے پر پابندی عائد کرے۔ اس کے علاوہ سرکاری افسران کو بھی ایسی تقاریب میں جانے سے روکا جائے۔

دوسری جانب ایڈووکیٹ اظہر صدیق کی جانب سے بلیک فرائیڈے منانے پر پابندی کے لیے صدر مملکت، وزیر اعظم اور صوبائی گورنر و وزرائے اعلیٰ کو خط بھی ارسال کیا گیا ہے ۔جس میں کہا گیا ہے سرکاری سطح پر بلیک فرائیڈے منانے اور پاکستان میں مغربی کلچر کے بڑھتے ہوئے فروغ پر پابندی عائد کی جائے۔ بلیک فرائیڈے کے بجائے برائٹ فرائیڈے کے نام سے صارفین کو سہولت مہیا کی جاسکتی ہے۔