بریکنگ نیوز
Home / پاکستان / اساتذہ مستقلی ٗ میرٹ کی بالادستی کی مثال قائم کر دی ٗ عاطف خان

اساتذہ مستقلی ٗ میرٹ کی بالادستی کی مثال قائم کر دی ٗ عاطف خان


پشاور ۔خیبر پختونخوا کے وزیر تعلیم محمد عاطف خان نے کہا ہے کہ حکومت نے نہ صرف 37ہزار اساتذہ کو میرٹ پر بھرتی کیا بلکہ ان کو مستقل کر کے انکا دیرینہ مطالبہ بھی پورا کردیا۔ ان اساتذہ کی مستقلی سے خیبر پختونخوامیں میرٹ کی بالا دستی کی نئی مثال قائم ہوئی ہے۔وہ شہید بے نظیر بھٹو ویمن یونیورسٹی پشاور کے زیر اہتمام انگلش مائیکرو سکالر شپ پروگرام کی اختتامی تقریب سے بحیثیت مہمان خصوصی خطاب کر رہے تھے۔

تقریب سے خیبر پختونخوا اسمبلی کی ڈپٹی سپیکر ڈاکٹر مہر تاج روغانی اور شہید بے نظیر بھٹو ویمن یونیورسٹی کی وائس چانسلر پروفیسر ڈاکٹر رضیہ سلطانہ نے بھی خطاب کیا۔محمد عاطف خان نے کہا کہ این ٹی ایس کے ذریعے بھرتی شدہ اساتذہ اور آئی ٹی اساتذہ کی مستقلی کی منظوری کابینہ نے دی ہے جبکہ یہاں سے منظوری کے بعد یہ بل اسمبلی میں پیش کیا جائے گا جبکہ اساتذہ کی کمی پوری کرنے کے پیش نظر حکومت مزید17ہزار اساتذہ بھی عنقریب میرٹ پر بھرتی کرے گی جن کے اشتہارات شائع ہو چکے ہیں۔ان نئے بھرتی ہونے والے اساتذہ میں 5ہزار خواتین اساتذہ ہیں جبکہ ہر نئے بننے والے پرائمری سکول میں خواتین اساتذہ بھرتی کی جائیں گی۔

انہوں نے کہا کہ حکومت اساتذہ کی ٹریننگ پر بھی56 کروڑ روپے خرچ کر رہی ہے جس میں صوبائی حکومت کو برٹش کونسل کی خدمات حاصل ہیں جبکہ حکومت نے تعلیم عام کرنے کی غرض سے گرلز کیڈٹ کالج مردان کی بنیاد رکھی ہے جہاں پر کراچی اور ملک کے دوسرے بڑے شہروں بشمول چھوٹے اور پسماندہ علاقوں کی لڑکیاں معیاری تعلیم حاصل کر رہی ہیں۔ محمد عاطف خان نے سکالر شپ ٹریننگ کے کامیاب انعقاد پر برٹش کونسل،وائس چانسلر پروفیسر ڈاکٹر رضیہ سلطانہ اور انسٹرکٹرز کو مبارکباد دی اور امید ظاہر کی کہ یہ پروگرام اسی طرح چلتا رہے گااور اس میں مزید اضافہ بھی ہوگا۔ تقریب کے اختتام پر محمد عاطف خان نے کامیاب طلباء اور ٹیچرزمیں سرٹیفیکیٹس تقسیم کئے۔