بریکنگ نیوز
Home / پاکستان / پنجاب میں دھند کا راج ، ٹریفک حادثات میں 12 افراد جاں بحق،متعددزخمی

پنجاب میں دھند کا راج ، ٹریفک حادثات میں 12 افراد جاں بحق،متعددزخمی


ملتان۔ پنجاب سمیت ملک کے بیشتر علاقے شدید دھند کی لپیٹ میں آگئے ،شدید دھند کے باعث ٹریفک حادثات میں ایک ہی خاندان کے 6افراد سمیت 12جاں بحق جبکہ متعدد زخمی ہوگئے ،زخمیوں کو قریبی ہسپتالوں میں منتقل کردیا گیا ہے جن میں سے کئی کی حالت تشویشناک ہے اور ہلاکتوں میں اضافے کاخدشہ ہے ،شدید دھند کے باعث فلائٹس آپریشن متاثر رہاجس کے باعث مسافروں کو شدید مشکلات کا سامنا رہاہے ۔اتوار کو پولیس کے مطابق ملتان کی تحصیل شجاع آباد میں شدید دھند کے باعث کار کے نہر میں گرنے سے 6 ، وہاڑی میں ٹرالی کی ٹکر سے 2 ، سلانوالی اور ٹوبہ ٹیک سنگھ میں بھی حادثات میں 4 افراد زندگی سے ہاتھ دھو بیٹھے۔پنجاب کے مختلف شہروں میں دھند کے باعث حادثات میں12 افراد زندگی سے ہاتھ دھو بیٹھے۔ شجاع آباد میں شدید دھند کے باعث کالی پل کے قریب ڈرائیور گاڑی پر قابو نہ رکھ سکا اور وہ نہر میں جا گری جس کے نتیجے میں 6 افراد جاں بحق ہو گئے۔ نہر سے تمام افراد کی لاشیں نکال لی گئیں جن کا تعلق ایک ہی خاندان سے تھا۔

بد قسمت خاندان ملتان سے شجاع آباد آرہا تھا۔ ایک اور حادثہ وہاڑی کے قریب پیش آیا جہاں ٹریکٹر ٹرالی نے موٹر سائیکل کو ٹکر مار دی جس سے موٹر سائیکل پر سوار 2 افراد جاں بحق ہو گئے۔ سلانوالی کے قریب دھند کے باعث سرگودھا روڈ پر ڈمپر نے موٹر سائیکل پر سوار دو بھائیوں کو کچل دیا جس سے دونوں ہی موقع پر ہی جاں بحق ہوگئے۔ ٹوبہ ٹیک سنگھ میں بھی دو مختلف حادثات میں دو افراد جاں بحق اور 4 زخمی ہو گئے۔ شدید دھند کے باعث نارووال میں بھی بس اور ٹریکٹر ٹرالی میں تصادم کے نتیجے میں 4 مسافر زخمی ہو گئے جنہیں ڈسٹرکٹ ہیڈ کوارٹر ہسپتال منتقل کر دیا گیا۔ادھر ترجمان موٹروے پولیس نے پنجاب میں شدید دھند کے باعث شہریوں کو غیر ضروری سفر کرنے سے گریز کرنے کی ہدایت کی ۔ پنجاب کے مختلف علاقوں میں شدید دھند کا راج رہا جس کے باعث کئی مقامات پر حد نگاہ صفر رہی ۔

موٹر وے کو لاہور سے پنڈی بھٹیاں اور فیصل آباد تک ٹریفک کیلئے بند کیاگیا۔صوبہ پنجاب کے مختلف شہروں میں دھند کا راج رہا جس کے باعث نظام زندگی مفلوج ہو کر رہ گیا جب کہ ٹریفک کی روانی بھی شدید متاثر ہوئی ۔ شدید دھند سے لاہور، ننکانہ، اوکاڑہ، اوچ شریف، سرگودھا، میاں چنوں، خا نیوال، فیصل آباد، رحیم یارخان، ملتان، بہاولپور، جلال پوربھٹیاں، سکھیکی اورگردونواح سمیت متعدد علا قوں میں حد نگا ہ اکثرمقامات پرصفر رہی ۔ ساہیوال میں دھند کی وجہ سے 7 سے زائد گرڈ اسٹیشن ٹرپ کرگئے جس کی وجہ سے کئی گھنٹوں سے بجلی کی فراہمی معطل ہوگئی ۔ فیسکو ترجمان کے مطابق فیصل آباد میں بھی دھند کے باعث ٹرانسمیشن لائنوں میں خرابی آ گئی ہے جس کے باعث شہر میں بجلی معطل ہوئی ہے، فیصل آباد سمیت فیسکو ریجن کے دیگر اضلاع میں بجلی کی فراہمی متاثر جب کہ بجلی کی بندش سے شہریوں کوروزمرہ کے امور نمٹانے میں مشکلات کا سامنا بھی کرناپڑا۔ بورے والا میں بھی 132 کے وی گرڈ اسٹیشن سے بجلی کی فراہمی 9 گھنٹوں سے معطل رہی جس کے باعث شہر اور 700 سے زائد دیہات بجلی سے محروم ہوگئے جب کہ اکثر علاقوں میں پانی کا ذخیرہ بھی ختم ہو گیا ۔