بریکنگ نیوز
Home / پاکستان / تاریخی مارچ سے مودی کو جواب دیں گے، عمران خان

تاریخی مارچ سے مودی کو جواب دیں گے، عمران خان


لاہور۔ تحریک انصاف کے چیئرمین عمران خان نے کہا ہے کہ کل رائیونڈ میں تاریخی مارچ کر کے بھارتی وزیراعظم نریندر مودی کو وہ جواب دیں گے جو پاکستان کے وزیر اعظم کو دینا چاہیےتھا۔

تفصیلات کے مطابق سربراہ تحریک انصاف عمران خان نے میڈیا سے گفتگو کرتے ہوئے کہا کہ ’’بھارت کی جانب سے لائن آف کنٹرول کی خلاف ورزی اور بلااشتعال فائرنگ کی سخت مذمت کرتے ہیں‘‘۔

انہوں نے کہا کہ ’’اگر پاکستان پر حملہ کیا گیا تو ملک کے عوام پاک فوج کے شانہ بشانہ کھڑے ہوکر بھارت کو ہر قسم کا جواب دینے کو تیار ہیں، انڈیا کو جنگ سے خبردار رہنا چاہیے تاہم اگر جنگ میں پہل کی گئی تو مادرِ وطن کے دفاع کے لیے کوئی بھی شخص پیچھے نہیں رہے گا‘‘۔

چیئرمین تحریک انصاف نے کہا کہ کل 30 ستمبر کو رائے ونڈ میں تاریخی مارچ ہوگا اور ملک بھر کے عوام اس میں شرکت کر کے بھارتی وزیراعظم کو وہ جواب دیں گے جو نوازشریف بطور وزیر اعظم نہیں دے سکے۔

پی ٹی آئی کے سربراہ نے عوام سے اپیل کی کہ وہ کرپشن کے خلاف کل ہونے والے احتجاجی مارچ میں بڑی تعداد میں شرکت کر کے قوم کا لوٹا ہوا پیسہ واپس لانے کی جدوجہد میں شامل ہوں۔