بریکنگ نیوز
Home / پاکستان / سلمان تاثیر نے ثابت کردکھایا ملک سب کے لیے ہے، بلاول

سلمان تاثیر نے ثابت کردکھایا ملک سب کے لیے ہے، بلاول


کراچی۔پاکستان پیپلزپارٹی کے چیئرمین بلاول زرداری نے شہید سلمان تاثیر کی پانچویں برسی پر انہیں زبردست خراج عقیدت پیش کیا ہے کہ سلمان تاثیر نے ثابت کردکھایا ملک سب کے لیے ہے۔ سلمان تاثیر کی پانچویں برسی کے موقع پر اپنے پیغام میں پاکستان پیپلزپارٹی کے چیئرمین نے کہا کہ شہید سلمان تاثیر نے یہ ثابت کرکے دکھایا کہ یہ ملک سب کے لیے ہے اور بانیان وطن کے نظریے کے پیروکار ہر سچے پاکستانی کا فرض بنتا ہے کہ وہ اقلیتوں سمیت تمام کمزور طبقات کا تحفظ کرے۔

بلاول زرداری نے کہا کہ متعصب عناصر کی جانب سے اپنے کمزور مخالفین کو دبانے اور اپنی ذاتی مرضی تھوپنے کے خلاف اور تمام مذاہب کے تقدس کے تحفظ کے لیے سلمان تاثیر چٹان کی طرح کھڑے رہے۔انہوں نے کہا کہ انتہا پسند اور متعصب عناصر دہشتگردی کو پروان چڑہا رہے ہیں ، پاکستان کے عوام کو ان بیماریوں سے چھٹکارہ حاصل کرنا پڑے گا۔

مساوات پر مشتمل ایک ایسا مسلم اکثریتی معاشرہ بنانا چاہیے جو کہ نہ صرف اسلامی دنیا بلکہ ماڈرن دنیا کے لیے بھی ایک ماڈل قوم کی طرح بلند کھڑا ہو۔بلاول زرداری نے کہا کہ کچھ عناصر قانون کا استحصال کرکے عوام کو بندوق کے زورپر یرغمال بنانا چاہتے ہیں لیکن انہیں پتا نہیں ہے کہ پاکستان پیپلزپارٹی اور ان کے شہید سلمان تاثیر جیسے اور دیگر پیروکاروں کے ہوتے ہوئے پاکستان میں ان کے مذموم عزائم کبھی کامیاب نہیں ہونگے۔