کراچی میں جوڈیشل مجسٹریٹ جنوبی کی عدالت نے پریوینشن آف الیکٹرانک کرائم ایکٹ (پیکا) کے تحت ایک مقدمے کا فیصلہ سناتے ہوئے ایک ملزم محمد شعیب کو لڑکی کی نازیبا تصاویر اور ویڈیوز سوشل میڈیا پر وائرل کرنے پر مجموعی طور پر 9 سال قید کی سزا سنائی ہے۔
یہ مقدمہ پیکا ایکٹ کے تحت درج کیا گیا تھا اور عدالت نے ملزم پر 90 ہزار روپے کا جرمانہ بھی عائد کیا۔ عدالت نے فیصلہ سناتے ہوئے کہا کہ ملزم کی یہ حرکت متاثرہ لڑکی کی ساکھ کو جان بوجھ کر نقصان پہنچانے کی کوشش تھی۔
ملزم کی سزا کے حوالے سے عدالت نے مزید کہا کہ 2017 میں بھی ملزم کو اسی نوعیت کے ایک کیس میں سزا ہو چکی تھی، اور اس کی اپیل ابھی تک سندھ ہائی کورٹ میں زیر سماعت ہے۔ ایف آئی اے کے مطابق ملزم متاثرہ لڑکی کا منگیتر تھا اور جب منگنی ختم ہوئی تو اس نے لڑکی کی نازیبا تصاویر سوشل میڈیا پر پھیلائیں۔
عدالت نے ملزم کو فوری طور پر گرفتار کر کے جیل بھیجنے کا حکم بھی دے دیا۔
