فواد چوہدری، علی زیدی سمیت 154ارکان اسمبلی اور سینیٹرز کی رکنیت معطل

اسلام آباد: الیکشن کمیشن نے اثاثوں کی تفصیلات جمع نہ کرانے پر پارلیمنٹ اور صوبائی اسمبلیوں کے154ارکان کی رکنیت معطل کر دی۔

  رکنیت معطل ہونے والے ارکان میں وفاقی وزراء بھی شامل ہیں۔

سینیٹ کے 3 قومی اسمبلی کے 48، پنجاب اسمبلی کے52، سندھ اسمبلی کے 19، خیبرپختونخوا اسمبلی کے 26اور بلوچستان اسمبلی کے 6ارکان کی رکنیت معطل کی گئی ہے۔

تفصیلات کے مطابق وفاقی وزراء  فوادچوہدری، علی حیدر زیدی  اور  ڈاکٹر فہمیدہ مرزا کی رکنیت  بھی معطل کی گئی ہے جبکہ قومی اسمبلی کے معطل ہونے والے دیگر ارکان میں خالد مقبول صدیقی،علی نواز اعوان،مہناز اکبر عزیز،شاندانہ گلزار، شیخ روحیل اصغر،مائزہ حمیدبھی شامل ہیں۔

 سینیٹ کے تین ارکان سینیٹر مصدق مسعود ملک، سینیٹر کامران مائیکل اور سینیٹر شمیم آفریدی کی رکنیت معطل کی گئی ہے۔ 

پنجاب اسمبلی کے معطل ارکان میں چوہدری  نثار علی خان بھی شامل ہیں جنہوں نے اب تک پنجاب  اسمبلی کی رکنیت کا  حلف نہیں اٹھایا۔

 سردار اویس احمد خان لغاری، رانا محمد افضل  اور چوہدری مظہر اقبال بھی پنجاب اسمبلی کے معطل ارکان میں شامل ہیں۔

 سندھ اسمبلی کے معطل ارکان میں ناصر حسین شاہ، سردار خان چانڈیو  سمیت دیگر ارکان شامل ہیں جبکہ خیبر پختونخوا اسمبلی  کے جن اراکین کی رکنیت معطل ہوئی ان میں شوکت علی، ہمایوں خان سمیت دیگر ارکان شامل ہیں۔

بلوچستان اسمبلی کے معطل ارکان میں  سردار یار محمد رند، مسعود علی خان سمیت دیگر ارکان شامل ہیں۔

الیکشن کمیشن اثاثوں کی تفصیلات جمع کرانے والے ارکان کی رکنیت بحال کر دے گا۔