229

ایمنسٹی سکیم اور معیشت کو درپیش چیلنج

سپریم کورٹ آف پاکستان نے ایمنسٹی سکیم میں مداخلت نہ کرنے کے ساتھ یہ بھی کہا ہے کہ مذکورہ سکیم حکومت کی وجہ سے فیل ہوئی جو نہیں ہونی چاہئے تھی چیف جسٹس آف پاکستان کا اپنے ریمارکس میں کہنا ہے کہ قرضوں پے قرضے لئے جارہے ہیں وہ نسل جو ابھی نہیں آئی اس پر بھی قرضے لاد دیئے گئے ہیں سمگلنگ کی کھلی چھوٹ دے دی گئی ہے صنعتوں کو اٹھنے ہی نہیں دیا گیا وہ معیشت کی بحالی کیلئے تھنک ٹینک بنانے کا کہنے کیساتھ یہ استفسار بھی کرتے ہیں کہ ملکی وسائل اور ایکسپورٹ بڑھانے کیلئے اقدامات کیوں نہیں کئے گئے عین اسی روز جب عدالت عظمیٰ ایمنسٹی سکیم میں مداخلت نہ کرنے کیساتھ معیشت کے حوالے سے اہم امور کی نشاندہی کررہی تھی وطن عزیز کی اوپن مارکیٹ میں امریکی ڈالر122روپے کی بلند ترین سطح پر پہنچ چکاتھا تجارتی خسارے سے متعلق مہیا اعدادوشمار میں یہ بھی بتایا جا رہا تھا کہ اس کا حجم34ارب ڈالر کی بلند ترین سطح پر ہے نگران وزیرخزانہ ڈاکٹر شمشاد اختر کا اسی روز پریس کانفرنس میں کہنا تھا کہ نگران حکومت آئی ایم ایف کے پاس نہیں جارہی وزارت خزانہ کے اعدادوشمار کے مطابق بجٹ خسارہ4.1 سے بڑھ کر6.1 فیصدہو رہا ہے قرضوں میں اضافہ غیر معمولی ہے۔

2013 میں جی ڈی پی کے تناسب سے قرضہ64 فیصد تھا جو اس وقت71فیصد سے تجاوز کرگیا ہے سرکاری کارپوریشنوں کے خسارے بھی بڑھ گئے ہیں اس پورے منظر نامے میں ڈالر کی قدر بڑھنے پر بیرونی ادائیگیوں کا سلسلہ متاثر ہورہا ہے تو پٹرولیم مصنوعات کے بڑھتے نرخوں نے رہی سہی کسر پوری کردی ہے اس ساری صورتحال میں مارکیٹ بری طرح متاثر ہو رہی ہے اور گرانی کا طوفان مزید شدت اختیار کررہا ہے اس وقت حکومت کو ایک جانب معیشت کی بحالی اور استحکام کیلئے اقدامات اٹھانا ہونگے تو دوسری صرف مارکیٹ کنٹرول کیلئے فول پروف نظام دینا ہوگا معیشت کی بحالی و استحکام اسی صورت ممکن ہے جب ماضی کی غلطیوں کو نہ دہرایا جائے مستقبل کیلئے ٹھوس اور موثر حکمت عملی ترتیب دی جائے اس بات کا خصوصی اہتمام بھی ناگزیر ہے کہ ہماری کوئی بھی حکمت عملی تکنیکی مہارت سے عاری نہ ہو۔

جنرل باجوہ کا دورہ کابل

آرمی چیف جنرل قمر جاوید باجوہ کی کابل میں افغان صدر اشرف غنی سے ون آن ون جبکہ چیف ایگزیکٹو عبداللہ عبداللہ اور اتحادی افواج کے کمانڈر جنرل نکلسن سے وفود کے ہمراہ تبادلہ خیال میں دوطرفہ تعلقات اور مصالحت کی کوششوں پر بات ہوئی آرمی چیف کی کابل روانگی سے قبل پاک فوج کے ترجمان نے اپنے پیغام میں کہا ہے کہ پاکستان افغانستان کی اتحادی حکومت امریکہ اور نیٹو فورسز کی طرف سے ملک میں قیام امن کی کوششوں کی کامیابی کا خواہاں ہے پاکستان افغانستان میں قومی اتفاق سے بننے والی حکومت کا خواہشمند ہے یہ حقیقت ہے کہ پاکستان افغانستان کے حالات سے متاثر چلاآرہاہے اس میں قیمتی جانوں کی قربانی کیساتھ پاکستان کی معیشت کو بھی سخت نقصان پہنچا ہے ایسے میں افغانستان میں امن کی خواہش پوری کرنے کیلئے پاکستان کی کاوشیں سب کے سامنے ہیں اس صورتحال میں ضرورت پاکستان کے موقف کو سمجھنے اور تسلیم کرنے کی ہے اور یہ کام افغانستان کیساتھ اسکے دیگر اتحادیوں کا بھی ہے اس میں امریکہ کو بھی اب ڈومور کی گردان چھوڑنا ہوگی اورپاکستان کے مثبت طرز عمل کا مثبت جواب دینا ہوگا۔