کراچی والوں کیلئے بجلی 10 روپے 80 پیسے سستی کرنے کا فیصلہ

اسلام آباد: نیپرا نے کے الیکٹرک صارفین کے لیے بجلی 10 روپے 80 پیسے سستی کر نے کا فیصلہ کردیا۔

نیشنل الیکٹرک پاور ریگولیٹری اتھارٹی (نیپرا) نے کے الیکٹرک کی دسمبر کی فیول چارجز ایڈجسمنٹ کے لیے درخواست پر سماعت کی جس دوران اتھارٹی کو بریفنگ دی گئی کہ دسمبر میں کے الیکٹرک کی فرنس آئل کھپت کم رہی، فرنس آئل اور ایل این جی کی قیمت بھی کم تھی، کے الیکٹرک درخواست کے مطابق کرا چی کے صارفین کو 12ارب روپے سے زیادہ کا ریلیف ملے گا۔

سی ایف او کے الیکٹرک نے کہا کہ ادارہ سولر اور ونڈ پر بجلی منصوبے لگانے پر کام کر رہا ہے۔

سماعت کے بعد چیئرمین نیپرا توصیف ایچ فاروقی نے کے الیکٹرک صارفین کے لیے فی یونٹ بجلی 10روپے 80 پیسے سستی کرنے کا اعلان کیا اور کہا کہ اس سے کے الیکٹرک صارفین کو  تقریبا 11 ارب روپے کا ریلیف ملے گا۔

نیپرا کےمطابق کے الیکٹرک صارفین کو دسمبر ایڈجسٹمنٹ کے تحت ریلیف دیاگیا ہے۔