بریکنگ نیوز
Home / کھیل / چیمپئنز ٹرافی 7 پاکستانی کرکٹرز لندن پہنچ گئے

چیمپئنز ٹرافی 7 پاکستانی کرکٹرز لندن پہنچ گئے


لاہور۔آئی سی سی چیمپئنز ٹرافی میں شرکت کیلئے ون ڈے کرکٹ ٹیم کے 7کھلاڑی لاہور ائیر پورٹ سے لندن پہنچ گئے ، لندن جانے والوں میں عمراکمل، شعیب ملک، محمد حفیظ، فخر زمان، عماد وسیم، جنید خان اور فہیم اشرف شامل ہیں، تاہم احمد شہزاد 18مئی کو ٹیم کو جوائن کریں گے‘ کپتان سرفراز احمد سمیت 8کھلاڑی ویسٹ انڈیز سے انگلینڈ پہنچے ہیں، قومی ٹیم 27 مئی کو بنگلہ دیش کے ساتھ پریکٹس میچ کھیلے گی، جبکہ 28مئی کو دوسرا پریکٹس میچ آسٹریلیا سے ہوگا۔ٹورنامنٹ میں پاکستان کا پہلا میچ 4جون کو روایتی حریف بھارت کے ساتھ ہوگا۔

جبکہ 7جون کو جنوبی افریقہ اور 12 جون کو سری لنکا کے ساتھ لیگ میچز ہونگے۔اس سے پہلے پاکستانی کرکٹ ٹیم پیر کی صبح ایک گھنٹے کی فلائٹ کے بعد ڈومینکا سے سینٹ لوشیا پہنچی، جہاں اس نے ٹرانزٹ میں ہوٹل میں 8گھنٹے آرام کیا۔ سینٹ لوشیا سے منگل کی صبح پاکستانی ٹیم لندن کے لئے روانہ ہوئی۔ لندن سے ٹیسٹ ٹیم کے کھلاڑی بر منگھم چلے جائیں گے جہاں چیمپئنز ٹرافی کا 10روز کیمپ لگے گا۔ون ڈے سکواڈ کے بقیہ کھلاڑی بھی برمنگھم میں ٹیم کو جوائن کریں گے، جبکہ مصباح الحق اور دیگر کھلاڑی پاکستان آجائیں گے‘۔

یونس خان 6دن لندن میں قیام کریں گے۔پرنس آف ویلز جمعرات کو لندن کے اوول گراؤنڈ پر آئی سی سی چیمپئنز ٹرافی کی لانچنگ تقریب کے مہمان خصوصی ہوں گے۔ پرنس اوول کی پچ پر ٹورنامنٹ میں شریک 8ٹیموں کے کھلاڑیوں سے ملیں گے اور ٹورنامنٹ کا با ضابطہ افتتاح کریں گے۔ چیمپئنز ٹرافی یکم سے اٹھارہ جون تک انگلینڈ میں ہو گی، روایتی حریف چار جون کو برمنگھم میں مدمقابل آئیں گے،بڑے میچ کے ٹکٹ پہلے ہی فروخت ہوچکے ہیں،تمام میچ سنسنی خیز ہوں گے۔