بریکنگ نیوز
Home / پاکستان / شریف برادران کیخلاف زیرالتوا انکوائریز جلد مکمل کرنیکی ہدایت

شریف برادران کیخلاف زیرالتوا انکوائریز جلد مکمل کرنیکی ہدایت

لاہور: قومی احتساب بیورو (نیب) کے چیئرمین قمر زمان چوہدری نے سابق وزیراعظم نواز شریف اور وزیراعلیٰ پنجاب شہباز شریف کے خلاف 16 زیر التوا انکوائریوں کو جلد مکمل کرنے کی ہدایت کردی۔

چیئرمین نیب قمر زمان چوہدری نے ادارے کی ایگزیکٹو بورڈ میٹنگ کے دوران افسران کو ہدایات جاری کیں کہ شریف برادران کے خلاف زیرالتوا انکوائریز جلد مکمل کی جائیں۔

واضح رہے کہ نیب میں سابق وزیراعظم میاں محمد نواز شریف کے خلاف 14 جبکہ وزیراعلیٰ پنجاب میاں محمد شہباز شریف کے خلاف 2 انکوائریز زیر التوا ہیں۔

سابق وزیراعظم نوازشریف کے خلاف وفاقی تحقیقاتی ادارے (ایف آئی اے) میں غیرقانونی تقرریوں، رائے ونڈ روڈ کی تعمیر اور لاہور ڈیولپمنٹ اتھارٹی (ایل ڈی اے) پلاٹوں کی غیرقانونی الاٹمنٹ سے متعلق انکوائریز زیر التوا ہیں۔

دوسری جانب وزیراعلیٰ شہباز شریف کے خلاف رائے ونڈ روڈ اور نواں کوٹ میں پلاٹ نوازنے سے متعلق انکوائری زیر التوا ہے۔

ایل ڈی اے کے پلاٹوں کی غیر قانونی الاٹمنٹ سے متعلق وزیراعلیٰ شہباز شریف کے خلاف 1 جبکہ نواز شریف کے خلاف 12 انکوائریز زیرالتوا ہیں۔

واضح رہے کہ شریف برادران کے خلاف انکوائریز کا آغاز جلاوطنی اختیار کرنے سے قبل کیا گیا تاہم ان کے جدہ جانے کے بعد یہ انکوائریاں بند کردی گئیں، جنہیں 12 اپریل 2006 کو دوبارہ شروع کیا گیا۔

نیب کی جانب سے جاری کردہ اعلامیے کے مطابق نواز شریف کو سپریم کورٹ کی جانب سے نا اہل قرار دیے جانے کے بعد نیب کا اجلاس منعقد ہوا جس میں فیصلہ کیا گیا کہ عدالت کی جانب سے مقررہ وقت کے اندر شریف خاندان کے خلاف اسلام آباد / راولپنڈی کی احتساب عدالت میں 4 مزید ریفرنس دائر کیے جائیں۔