پشاور ہائیکورٹ نے سنی اتحاد کونسل کی مخصوص نشستوں کی الاٹمنٹ کے حوالے سے کیس کا تفصیلی فیصلہ جاری کرتے ہوئے الیکشن کمیشن کا فیصلہ درست قرار دے دیا۔ 30 صفحات پر مشتمل تفصیلی فیصلہ پشاور ہائیکورٹ کے جسٹس ایس ایم عتیق شاہ نے تحریر کیا۔ عدالت نے تفصیلی فیصلے میں کہا کہ پشاور ہائیکورٹ کے پاس صوبے تک مخصوص نشستوں کی الاٹمنٹ کے کیسز سنے کا اختیار ہے جبکہ یہ اختیار صرف صوبے تک محدود ہے۔ تفصیلی فیصلے میں کہا گیا کہ الیکشن کمیشن کا دیگر سیاسی جماعتوں میں مخصوص نشستوں کی تقسیم کا فیصلہ آئین کے آرٹیکل 51 کے مطابق ہے، سنی اتحاد کونسل خواتین کی مخصوص نشست کے حق دار نہیں، مقررہ وقت گزرنے کے بعد مخصوص نشست کی لسٹ جمع نہیں کرائی جا سکتی۔ فیصلے میں مزید کہا گیا کہ درخواست گزار کی جانب سے یہ اعتراض اٹھایا گیا کہ یہ مخصوص نشستیں دوسری سیاسی جماعتوں میں تقسیم نہیں ہو سکتی۔ بعد ازاں عدالت نے قرار دیا کہ سنی اتحاد کونسل مخصوص نشستوں کی حق دار نہیں اس لیے درخواست خارج کی جاتی ہے۔ یاد رہے کہ پشاور ہائیکورٹ کے 5 رکنی لاجر بینچ نے 14 مارچ کو مختصر فیصلہ سنایا تھا۔
