الیکشن کمیشن آف پاکستان کے ترجمان نے ایک بیان میں کہا ہے کہ 21 اپریل کو ہونے والے آئندہ ضمنی انتخابات کے دوران قومی اور صوبائی دونوں اسمبلیوں کی 23 خالی نشستوں کے لیے کل 239 امیدوار میدان میں اتریں گے۔
گزشتہ روز جاری کردہ بیان میں انہوں نے کہا کہ قومی اسمبلی کی خالی نشستوں کے لیے کل 50 امیدوار مد مقابل ہیں۔
واضح رہے کہ پیپلز پارٹی کی آصفہ بھٹو زرداری پہلے ہی این اے 207 سے بلامقابلہ منتخب ہو چکی ہیں۔
ترجمان کا کہنا تھا کہ خیبرپختونخوا اسمبلی کی خالی نشستوں کے لیے کل 23 امیدوار میدان میں اتریں گے جبکہ پنجاب میں 154 امیدوار اپنی قسمت آزما رہے ہیں۔
جبکہ سندھ میں زبیر احمد جونیجو نے پی ایس 80 سے بلامقابلہ اپنی نشست حاصل کرلی ہے، بلوچستان اسمبلی کی خالی نشستوں کے لیے 12 امیدوار میدان میں ہیں۔
ترجمان نے مزید کہا کہ الیکشن کمیشن 30 مارچ کو متعلقہ ریٹرننگ افسران کی جانب سے امیدواروں کی فہرستوں کو حتمی شکل دینے کے بعد ضمنی انتخابات کے لیے بیلٹ پیپرز کی چھپائی شروع کرے گا۔
انہوں نے کہا کہ صوبائی الیکشن کمشنرز کو ضروری انتخابی سامان فراہم کر دیا گیا ہے۔
مزید برآں ڈسٹرکٹ ریٹرننگ افسران اور ریٹرننگ افسران مقررہ انتخابی شیڈول کے مطابق اپنی ذمہ داریاں پوری کر رہے ہیں۔
ترجمان کے مطابق کمیشن نے وزارت داخلہ اور وزارت دفاع کے ساتھ ساتھ صوبائی قانون نافذ کرنے والے اداروں کے ساتھ بھی قریبی رابطہ قائم کیا ہوا ہے۔
یاد رہے کہ 13اپریل کو الیکشن کمیشن نے قومی و صوبائی اسمبلیوں کی 23 نشستوں پر 21 اپریل کو ضمنی انتخابات کرانے کا اعلان کر دیا تھا۔
الیکشن کمیشن کی جانب سے جاری کیے گئے شیڈول کے مطابق قومی اسمبلی کی 6، پنجاب اسمبلی کی 12، خیبرپختونخوا اور بلوچستان اسمبلی کی 2، 2 جبکہ سندھ اسمبلی کی ایک نشست پر ضمنی انتخاب ہوگا۔
قومی اسمبلی کے ان حلقوں پر انتخابات ہوں گے۔
حلقہ این اے -8 ، باجوڑ
حلقہ این اے 44، ڈیرہ اسمٰعیل خان
حلقہ این اے 119، لاہور
حلقہ این اے 132، قصور
حلقہ این اے 196، قمبر شہدادکوٹ
پنجاب اسمبلی کے ان حلقوں پر انتخابات ہوں گے۔
پی پی 22، چکوال کم تلہ گنگ
پی پی 32، گجرات
پی پی 36، وزیرآباد
پی پی 54، نارروال
پی پی 93، بھکر
پی پی 139، شیخوپورہ
پی پی 147، لاہور
پی پی 149، لاہور
پی پی 158، لاہور
پی پی 164، لاہور
پی پی 266، رحیم یار خان
پی پی 290، ڈی جی خان
خیبرپختونخوا اسمبلی کے ان حلقوں پر انتخابات ہوں گے۔
حلقہ پی کے 22، باجوڑ
حلقہ پی کے 91، کوہاٹ
بلوچستان اسمبلی کے ان حلقوں پر انتخابات ہوں گے۔
حلقہ پی بی 20، خضدار
حلقہ پی بی 22، لسبیلہ
