گورنر خیبر پختونخوا فیصل کریم کنڈی نے پشاور میں گفتگو کرتے ہوئے کہا کہ پی ٹی آئی کے وزرا کرپشن میں مکمل طور پر ملوث ہیں۔ ان کے مطابق افغانستان کی زمین دہشت گردوں کے لیے استعمال ہو رہی ہے اور بھارت کے ساتھ جنگ ہو یا مذاکرات، پاکستان ہر صورت میں تیار ہے۔
فیصل کریم کنڈی نے کہا کہ ملکی دفاع کے لیے پاکستانی افواج پوری صلاحیت رکھتی ہیں اور دشمن کو سخت جواب دیا جائے گا۔ ان کا کہنا تھا کہ ملک میں سیاسی استحکام لانے کے لیے تمام اسٹیک ہولڈرز کو ایک ساتھ بیٹھنا ہو گا۔
انہوں نے الزام عائد کیا کہ خیبر پختونخوا میں امن و امان کی صورتحال بدترین ہے اور صوبائی حکومت اس حوالے سے سنجیدہ نظر نہیں آتی۔ کنڈی نے کہا کہ معیشت کی بہتری کے لیے امن ضروری ہے۔
انہوں نے پیشگوئی کی کہ اگلی حکومت پیپلز پارٹی بنائے گی اور الزام لگایا کہ موجودہ حکومت فارم 47 کی پیداوار ہے، جبکہ وزیر اعلیٰ اسلام آباد کے احکامات پر عمل کر رہے ہیں۔
فیصل کریم کنڈی نے کہا کہ صوبے میں پوسٹنگز اور تبادلوں کے عوض لین دین ہو رہا ہے، پنشن کے فنڈز میں خردبرد کی جا رہی ہے اور یونیورسٹی ملازمین تنخواہوں کے لیے ترس رہے ہیں۔ ان کا یہ بھی کہنا تھا کہ پی ٹی آئی کے کئی بھگوڑے یورپ میں پناہ لیے ہوئے ہیں۔
