بھارت کے ایک گاوں میں کوئی سنگ دل شخص شدید سردی کی رات میں نومولود کو ویرانے میں پھینک کر فرار ہوگیا، تاہم نوازئیدہ بچی کو ویرانے میں موجود کتیاں اور اس کے بچوں نے بچا کر ٹھٹھرتی سرد رات میں اس کی حفاظت کی، جو کہ پھر صبح مقامی کسانوں کو نارمل و صحت مند مل گئی۔
بھارتی میڈیا رپورٹس کے مطابق بھارتی ریاست چھتیس گڑھ کے گاؤں سریستال میں ٹھٹھرتی رات میں بے لباس بچی کو سب سے پہلے ایک کتیا نے دیکھا جو اس کی حفاظت کے لیے ساری رات وہیں بیٹھی پہرا دیتی رہی، ناصرف کتیا بلکہ اس کے بچے بھی نوزائیدہ کے پاس ہی بیٹھے رہے۔
رپورٹس کے مطابق مقامی کسانوں نے بتایا کہ صبح 11 بجے کے قریب ہم نے کھیتوں سے بچی کے رونے کی آوازیں سنیں جس کے بعد ہم فوری طور پر آواز کا تعاقب کرتے ہوئے وہاں پہنچے، اس جگہ پہنچنے پر ہم دیکھ کر حیران رہ گئے کہ بچی کے ارد گرد کتے کے چھوٹے چھوٹے بچے بیٹھے ہیں۔
میڈیا رپورٹس کے مطابق بچی کا طبی معائنہ کرنے کے بعد ڈاکٹروں نے بتایا کہ بچی سردی میں رات بھر یوں پڑے رہنے کے باوجود بالکل صحت مند ہے۔
ڈاکٹر نے خیال ظاہر کیا کہ کتیا اور اس کے بچوں نے نومولود کو رات بھر گرمائش فراہم کی جس سے بچی محفوظ رہی۔
تاہم پولیس کی جانب سے واقعہ کی تحقیقات کا آغاز کردیا گیا ہے۔
