پختونخواہ سے سال 2023 کا پہلا پولیو کیس رپورٹ

اسلام آباد: ملک میں سال 2023 کا پہلا پولیو کیس رپورٹ ہوگیا، پولیو کیس صوبہ خیبر پختونخواہ کے ضلع بنوں سے رپورٹ ہوا ہے۔

تفصیلات کے مطابق ملک میں رواں سال پولیو وائرس کا پہلا کیس رپورٹ ہوگیا، قومی ادارہ صحت کی لیبارٹری نے پولیو کیس کی تصدیق کردی۔

ذرائع کا کہنا ہے کہ پولیو کیس صوبہ خیبر پختونخواہ کے ضلع بنوں سے رپورٹ ہوا ہے۔

اینڈ پولیو پاکستان کے مطابق گزشتہ برس 2022 میں پاکستان میں 20 پولیو کیسز رپورٹ ہوئے تھے جو سب کے سب پختونخواہ سے رپورٹ ہوئے۔

سنہ 2021 میں صرف ایک پولیو کیس بلوچستان سے رپورٹ ہوا تھا۔

سنہ 2020 میں ملک بھر سے 84 پولیو کیس جبکہ 2019 میں 147 پولیو کیسز رپورٹ ہوئے جو کہ پولیو کیسز کی بلند ترین شرح تھی۔

ملک بھر میں پولیو کیسز کی سب سے زیادہ شرح خیبر پختونخواہ میں ہے۔