اسلام آباد ہائیکورٹ نے موٹر وے زیادتی کیس سے مماثلت کی بناء پر پیمرا کی جانب سے پابندی عائد کیے جانے والے ڈرامہ سیریل ’ حادثہ‘ کو نشر کرنے کی مشروط اجازت دے دی ہے۔
رپورٹ کے مطابق موٹروے ریپ کیس کی متاثرہ خاتون کی جانب سے نشرکیے جانے والے اس ڈرامہ سیریل کے خلاف سوالات اٹھائے جانے کے بعد پیمرا نے پابندی عائد کردی تھی۔اسلام آباد ہائیکورٹ نےاپنے فیصلے میں کہا کہ ڈرامے کی پانچویں قسط میں اگر ریپ سین ہے تو پروڈیوسر/ ڈائریکٹر اسے دوبارہ نشر نہ کرنے کا بیان حلفی دیں گے ۔ عدالت نے فیصلہ جاری کرتے ہوئے ڈرامہ نشر کرنے سے روکنے کا پیمرا کا 30 اگست کا نوٹیفکیشن معطل کردیا۔
واضح رہے کہ 9 ستمبر2020 کو پیش آنے والے اس واقعے میں لاہورکے قریب موٹر وے پررات کے وقت دو افراد نے لوٹ مار کے بعد گاڑی چلانے والی خاتون کا ریپ اس کے بچوں کے سامنے کیا تھا۔
اگست کے اختتام پراپنی ایکس پوسٹ میں یہ معاملہ اٹھانے والی ٹی وی اینکر نےبتایا تھا کہ ریپ کیس کی متاثرہ خاتون نے انہیں فون کیا ہے اور وہ ڈرامہ ’ حادثہ‘ دیکھ رک شدید کرب سے گزررہی ہیں۔اینکر نے ناظرین سے کہا تھا کہ وہ بغیر اجازت یہ ڈرامہ بنانے پر اسے پیمرامیں رپورٹ کریں تا کہ اس پر پابندی عائد کی جائے۔
بعد ازاں اس ڈرامے میں مرکزی کردار ادا کرنے والی اداکارہ حدیقہ کیانی کی جانب سے وضاحت سامنے آئی تھی۔
