کراچی: ویسٹ انڈیز ویمنز کے خلاف سیریز کے لیے پاکستان ویمنز اسکواڈ کا اعلان کر دیا گیا، پانچ کرکٹرز کی اسکواڈ میں واپسی ہوئی ہے، سیریز 18 اپریل سے 3 مئی تک کھیلی جائے گی۔
چیف سلیکٹر سابق ٹیسٹ کرکٹر سلیم جعفر کی سربراہی میں قومی ویمن سلیکشن کمیٹی نے ویسٹ انڈیز کی خواتین ٹیم کے خلاف 16 رکنی ون ڈے اور ٹی20 اسکواڈ کا اعلان کیا۔
تین ون ڈے جو آئی سی سی ویمنز چیمپئن شپ کا حصہ ہیں 18 سے 23 اپریل کے درمیان کھیلے جائیں گے جبکہ پانچ ٹی ٹوئنٹی 26 اپریل سے 3 مئی تک ہوں گے۔ تمام 8میچز کراچی کے نیشنل بینک اسٹیڈیم میں کھیلے جائیں گے۔
ون ڈے سیریز کے لیے وکٹ کیپر بیٹرز سدرہ نواز (67 ون ڈے، 56 ٹی ٹوئنٹی) کی واپسی ہوئی ہے جبکہ ٹی20 کے لیے چار کھلاڑی عائشہ ظفر ، گل فیروزہ، رامین شمیم اور طوبیٰ حسن اسکواڈ میں واپس آئی ہیں۔ عائشہ، گل فیروزہ اور رامین جو ٹی ٹوئنٹی اسکواڈ کا حصہ ہیں 17 اپریل سے فیصل آباد میں شروع ہونے والے ویمنز ون ڈے ٹورنامنٹ میں شرکت کریں گی۔ ٹی ٹوئنٹی سیریز سے قبل تینوں کھلاڑی قومی ٹیم کو دوبارہ جوائن کر لیں گی۔
ون ڈے سیریز کے اختتام پر صدف شمس، سدرہ نواز اور وحیدہ اختر ڈومیسٹک ون ڈے ٹورنامنٹ میں شرکت کے لیے فیصل آباد چلی جائیں گی۔ لیگ اسپنر غلام فاطمہ کو آرام دیا گیا ہے تاکہ وہ کار حادثے میں لگنے والی چوٹوں سے مکمل طور پر صحت یاب ہوسکیں۔
وہ کراچی میں 20 کھلاڑیوں کے کیمپ کا حصہ تھیں۔ کار حادثے میں زخمی ہونے والی دوسری کرکٹر سابق قومی ویمن کپتان بسمہ معروف اگلے ہفتے فٹنس ٹیسٹ دیں گی جس کے بعد ان کے انتخاب کا فیصلہ کیا جائے گا۔
چیف سلیکٹر سلیم جعفر کا کہنا ہے کہ سلیکشن کمیٹی نے کپتان ندا ڈار اور عبوری ہیڈ کوچ کی مشاورت سے ون ڈے اور ٹی20 سیریز کے لیے 16 رکنی اسکواڈ کو حتمی شکل دے دی ہے۔ اسکواڈ میں شامل پانچ کھلاڑی ڈومیسٹک ٹورنامنٹ میں اپنی کارکردگی اور کیمپ میں اچھی مہارت کا مظاہرہ کرنے کی وجہ سے واپس آئی ہیں۔
ویسٹ انڈیز کے خلاف سیریز ہمارے لیے اہم ہے کیونکہ یہ ون ڈے آئی سی سی ویمنز چیمپئن شپ کا حصہ ہے اور ہم ہوم سیریز میں زیادہ سے زیادہ پوائنٹس حاصل کرنا چاہتے ہیں تاکہ اگلے سال ہونے والے آئی سی سی ویمنز ورلڈ کپ کے لیے براہ راست کوالیفائی کرنے کے اپنے امکانات کو بڑھا سکیں۔
ون ڈے اسکواڈ
ندا ڈار (کپتان) عالیہ ریاض، بسمہ معروف (فٹنس سے مشروط)، ڈیانا بیگ، فاطمہ ثناء، منیبہ علی، نجیہہ علوی (وکٹ کیپر)، نشرہ سندھو، نتالیہ پرویز، صدف شمس، سعدیہ اقبال، سدرہ امین، سدرہ نواز (وکٹ کیپر) طوبیٰ حسن، ام ہانی اور وحیدہ اختر شامل ہیں۔
ٹی 20 اسکواڈ
ندا ڈار (کپتان)، عالیہ ریاض، عائشہ ظفر، بسمہ معروف ( فٹنس سے مشروط)، ڈیانا بیگ، فاطمہ ثنا، گل فیروزہ، منیبہ علی (وکٹ کیپر) ، نجیہہ علوی (وکٹ کیپر)، نشرہ سندھو، نتالیہ پرویز، رامین شمیم، سعدیہ اقبال، سدرہ امین، طوبہ حسن اور ام ہانی پر مشتمل ہوگا۔
اٹھارہ اور اکیس اپریل کو پہلے اور دوسرے ون ڈے کے اوقات میں تبدیلی کی گئی ہے تاکہ یہ پاکستان بمقابلہ نیوزی لینڈ سیریز کے ساتھ متصادم نہ ہوسکیں۔ اب یہ میچز صبح 9.30 بجے شروع ہونگے۔
تیسرا ون ڈے دوپہر ساڑھے 3 بجے شروع ہوگا جب کہ ٹی ٹوئنٹی میچز شام ساڑھے 7 بجے کھیلے جائیں گے۔ 16 رکنی ون ڈے اسکواڈ 13 اپریل کو کراچی میں جمع ہوگا اور 14 سے 17 اپریل تک نیشنل بینک اسٹیڈیم میں شیڈول ٹریننگ سیشن میں شرکت کرے گا۔ ویسٹ انڈیز کی خواتین کرکٹ ٹیم 14 اپریل کو کراچی پہنچے گی۔
