پاکستان کرکٹ ٹیم کے فاسٹ بولر شاہین آفریدی نے اسرائیلی افواج کے حملوں کے شکار فلسطینی عوام سے اظہار ہمدردی کرتے ہوئے ان کے لیے خصوصی پیغام جاری کیا ہے۔
گزشتہ روز بھی فلسطینی شہر غزہ پر اسرائیلی فوج نے حملہ کیا،حملوں میں فلسطینی مزاحمتی تنظیم حماس کے کئی تربیتی مقامات کو نشانہ بنایا گیا۔
اس سے قبل اسرائیلی فورسز نے بدھ کے روز احتجاج کرنے والے فلسطینیوں پر آنسو گیس فائر کیے اور ہینڈ گرینیڈ کا بھی استعمال کیا جب کہ اس دوران 4 فلسطینیوں کو گرفتارکیا گیا۔
بدھ اور جمعرات کی درمیانی شب درجنوں اسرائیلی فوجیوں نے ایک بار پھر مسجد اقصیٰ پر یلغار کی جب کہ اس سے قبل فورسز نے نماز فجر کے لیے آنے والوں کو بھی مسجد میں داخلے سے روک دیا جس کے باعث سیکڑوں افراد نے مسجد اقصیٰ کے آس پاس نماز فجر ادا کی۔
اسرائیلی مظالم کے شکار فلسطینیوں سے اظہار یکجہتی کرتے ہوئے شاہین آفریدی نے سوشل میڈیا پر بیان جاری کیا۔
شاہین آفریدی نے لکھا کہ' مومن ایک جسم کی طرح ہوتے ہیں، اگر جسم کا کوئی حصہ ٹھیک نہ ہو تو سارا جسم اس تکلیف کو محسوس کرتا ہے، ہم بار بار مسجد اقصیٰ میں ہونے والے ظلم کو محسوس کر سکتے ہیں'۔
انہوں نے کہا کہ اللہ تعالیٰ فلسطینی عوام کی مشکلات کو آسان فرمائے، آمین۔
