آئی سی سی ون ڈے ورلڈکپ کے 35 ویں اور اہم میچ میں پاکستان نے ڈک ورتھ لوئس (ڈی ایل ایس) میتھڈ کے تحت نیوزی لینڈ کو 21 رن سے شکست دے کر 2 قیمتی پوائنٹ حاصل کرلیے۔
نیوزی لینڈ کو شکست دے کر پاکستان نے 2 قیمتی پوائنٹ کے ساتھ ٹیبل پر ایک بار پانچویں پوزیشن حاصل کرلی ہے اور رن ریٹ بھی بہتر ہوکر مثبت ہوگیا ہے۔
سیمی فائنل میں جانے کے لیے گرین شرٹس ایک فتح کی دوری پر ہیں، پاکستان کی سیمی فائنل میں پہنچنے کی امیدیں نہ صرف قائم ہیں بلکہ مزید بڑھ گئی ہیں، لیکن اس کے لیے یہ دعا کرنا ہوگی کہ نیوزی لینڈ اور سری لنکا کے درمیان میچ میں سری لنکا کو فتح ملے، اگر کیویز جیتے تو پاکستان کو انگلینڈ کے خلاف بڑے مارجن سے کامیابی حاصل کرنا ہوگی۔
نیوزی لینڈ کا رن ریٹ پاکستان سے زیادہ ہے اور سری لنکا سے فتح کی صورت میں وہ 10 پوائنٹ کے ساتھ مزید بہتر ہوجائےگا، پھر پاکستان کو انگلینڈ کے خلاف نہ صرف میچ جیتنا ہوگا بلکہ بہت بڑے مارجن سے جیتنا ہوگا۔
بھارت اور جنوبی افریقا سیمی فائنل میں پہنچ گئے ہیں جب کہ افغانستان بھی لاسٹ فور کی دوڑ میں شامل ہے۔
افغانستان 8 پوائنٹ کے ساتھ چھٹے نمبر پر موجود ہے لیکن اس کے دو میچ باقی ہیں، اگر وہ دونوں ہار گیا تو 8 پوائنٹ پر ٹورنامنٹ کا اختتام کرےگا لیکن اگر ایک میچ بھی جیتا تو اس کے سیمی فائنل میں پہنچنےکا انحصار رن ریٹ پر ہوگا جس میں وہ کافی پیچھے ہے۔
پوائنٹس ٹیبل پر بھارت 14 پوائنٹ کے ساتھ سرفہرست ہے جب کہ جنوبی افریقا دوسرے اور آسٹریلیا تیسرے نمبر پر ہے، نیوزی لینڈ کا چوتھا ، پاکستان کا پانچواں اور افغانستان کا چھٹا نمبر ہے، دفاعی چیمپئن انگلینڈ سب سے آخری دسویں نمبر پر ہے۔
