نگراں وزیراعظم انوارالحق کاکڑ اور سری لنکا کے صدر رانیل وکرما سنگھے نے پاکستان اورسری لنکا کے درمیان سیاسی، اقتصادی وسماجی شعبوں اور دونوں ممالک کے عوام کے درمیان رابطوں کے فروغ کے لیے دیرینہ تعاون کو مزید مضبوط بنانے سے اتفاق کیا ہے۔
دونوں رہنماؤں کے درمیان ہفتہ کودوبئی میں کوپ 28 اجلاس کے موقع پردوطرفہ ملاقات ہوئی۔
دونوں رہنماؤں نے پاکستان اورسری لنکا کے درمیان قریبی و خوشگوار تعلقات اور دونوں ممالک کے عوام درمیان بے پناہ خیرسگالی پر گرمجوشی سے تبادلہ خیال کیا۔
سری لنکا کے صدرنے وزیراعظم کو مالیاتی مشکلات اورمہنگائی سے نمٹنے کے لیے سری لنکا کے اقدامات وتجربات سے آگاہ کیا۔
نگراں وزیراعظم نے سری لنکا کے صدر کو معیشت کی بحالی کے لیے حکومت کی جانب سے ہونے والی کوششوں سے آگاہ کیا۔
انوار الحق کاکڑ اور صدر وکرماسنگھے نے جنوبی ایشیا میں امن اور ترقی کو فروغ دینے اور ماحولیاتی تبدیلیوں کے منفی اثرات سمیت مشترکہ چیلنجوں سے نمٹنے کے لیے مل کر کام کرنے کی اہمیت پر بھی تبادلہ خیال کیا۔
