صدرمملکت ڈاکٹر عارف علوی نے کہا ہے کہ اسکولوں سے باہر رہ جانے والے 28 ملین بچوں کو تعلیم فراہم کرنا بہت بڑا چیلنج ہے۔
تفصیلات کےمطابق صدر مملکت ڈاکٹر عارف علوی کے زیرِ صدارت مساجد و مدارس سے متعلق اجلاس ہوا۔ اجلاس میں وفاقی وزیر برائے مذہبی امور، چیئرمین اسلامی نظریاتی کونسل، صوبائی وزرا اور نمائندوں نے شرکت کی۔
اجلاس سے خطاب کرتے ہوئے صدر مملکت ڈاکٹرعارف علوی نے کہا کہ پاکستان میں تقریبا ً 2 کروڑ 80 لاکھ بچے اسکول نہیں جا پاتے، بچوں کو تعلیم کی فراہمی کیلئے مساجد کے ساتھ مشترکہ کوششیں کرنا ہوں گی۔
صدر مملکت کا کہنا تھاکہ مساجد کو خواندگی اور تعلیمی مقاصد کیلئے استعمال کیا جا سکتا ہے، مساجد و مدارس مقامی سطح پر اہم سماجی اور صحت کے مسائل پر آگاہی پیدا کریں، اسکولوں سے باہر رہ جانے والے 28 ملین بچوں کو تعلیم فراہم کرنا بہت بڑا چیلنج ہے۔
ڈاکٹرعارف علوی کا مزید کہنا تھا کہ علما کرام جمعہ کے خطبات کے ذریعے اخلاقی اقدار، رواداری، امن، بین المذاہب ہم آہنگی کو فروغ دیں۔
