لاہور: مسلم لیگ (ق)نے تحریک انصاف میں ضم ہونے کا حتمی فیصلہ کرلیا۔ ذرائع کے مطابق وزیراعلی پنجاب چودھری پرویز الٰہی نے پارٹی کی سینئر قیادت اور رہنماؤں سے مشاورت مکمل کرلی ہے، قائدین نے حتمی فیصلہ کا اختیار پرویزالٰہی کو دے دیا ہے۔
ذرائع کے مطابق چوہدری پرویز الہٰی آج شام 6 بجے اپنے اراکین کے ساتھ تحریک انصاف میں شامل ہوں گے۔ قبل ازیں پرویز الہی نے مسلم لیگ(ق)کا اہم اجلاس طلب کیا تھا۔
دریں اثنا چودھری پرویز الہٰی نے چیئرمین پی ٹی آئی عمران خان کی پیشکش پر(ق)لیگ کو تحریک انصاف میں ضم کرنے کا حتمی فیصلہ کرلیا۔
واضح رہے کہ چیئرمین تحریک انصاف عمران خان نے چودھری پرویز الٰہی اور مونس الٰہی کو ق لیگ کی پی ٹی آئی میں ضم ہونے کی پیشکش کی تھی۔
دریں اثناء پرویز الٰہی نے میڈیا سے گفتگو کرتے ہوئے عمران خان نے کہا ہے کہ ق لیگ پی ٹی آئی میں ضم ہو جائے تو بہتر ہے۔ انہوں نے کہا کہ ہماری بھی یہی کوشش ہے کہ معاملہ الیکشن کمیشن تک نہ جائے۔
