ہشت گردوں کے ساتھ فائرنگ کے تبادلے میں شہید اہلکاروں کی نماز جنازہ پولیس لائن بنوں میں سرکاری اعزاز کے ساتھ ادا

دہشت گردوں کے ساتھ فائرنگ کے تبادلے میں شہید اہلکاران کی نماز جنازہ پولیس لائن میں سرکاری اعزاز کے ساتھ ادا کردی گئی ۔۔۔

 پولیس کے چاق وچوبند دستے نے شہداء کے جسد خاکی کو سلامی پیش کی۔ 

اے آئی جی سی ٹی ڈی شوکت عباس، آر پی او بنوں سجاد خان، ڈی پی او بنوں سلیم عباس کلاچی، ایس پی سی ٹی ڈی فضل واحد، کمشنر بنوں اور پاک آرمی کے افسران سمیت دیگر حکام کی شرکت

تفصیلات کے مطابق گزشتہ شب دہشتگردوں کے ساتھ فائرنگ کے تبادلے میں شہید ہونے والے اہلکاران اسسٹنٹ سب انسپکٹر بنیامین خان، کانسٹیبل انعام خان اور کانسٹیبل مصور خان کی نماز جنازہ بنوں پولیس لائن میں سرکاری اعزاز کیساتھ ادا کردی گئی۔
 اے آئی جی سی ٹی ڈی شوکت عباس، آر پی او بنوں سجاد خان، ڈی پی او بنوں سلیم عباس کلاچی، کمشنر بنوں،ایس پی سی ٹی ڈی سمیت اعلیٰ فوجی ،سول حکام و دیگر پولیس افسران اور شہداء کے لواحقین نے کثیر تعداد میں جنازے میں شرکت کی۔اے آئی جی، آر پی او بنوں، ڈی پی او بنوں، ایس پی سی ٹی ڈی اور اسسٹنٹ کمشنر نے قومی پرچم میں لپٹے شہید کے تابوت پر پھول چڑھائے اور ان کی مغفرت کے لئے خصوصی دعائیں کیں۔ واضح رہے کہ شہید پولیس اہلکاران سب انسپکٹر بنیامین خان، کانسٹیبل انعام خان اور کانسٹیبل مصور خان سی ٹی ڈی میں تعینات تھے۔ جو گزشتہ شب دہشتگردوں کیساتھ فائرنگ کے تبادلے میں شہادت کے بلند مرتبے پر فائز ہوگئے۔ جبکہ دواہلکاران وافد اور عمران زخمی ہوئے تھے، جنہیں علاج معالجے کی خاطر ہسپتال منتقل کئے گئےہیں۔
پولیس کی جوابی کاروائی سے 02 دہشت گرد جہنم واصل ہوئے اور کئی زخمی ہو گئے۔ جنہیں ساتھی دہشت گرد اپنے ساتھ لے کر فرار ہوگئے۔
شہید پولیس اہلکاران کے جسد خاکی کو سرکاری اعزاز کے ساتھ آبائی علاقے کو روانہ کر دیا گیا ہے جہاں پر شہداء کو پورے سرکاری اعزاز کیساتھ سپرد خاک کیے جائیں گے۔
اس موقع پر ایڈیشنل آئی جی سی ٹی ڈی  نے پیغام جاری کرتے ہوئے کہا کہ شہید پولیس جوان ہمارا فخر ہےجنہوں نے ملک و قوم کی سلامتی و بقا کی خاطر اپنی جان قربان کردی۔ ہم ان جانبازوں کو کبھی نہیں بھولیں گے۔ دہشتگرد اپنے ناپاک عزائم سے ہمارے حوصلے پست نہیں کرسکتے۔ ہم ان کا ڈٹ کر مقابلہ کریں گے اور ان کے ناپاک عزائم خاک میں ملا دیں گے۔
آر پی او بنوں کا کہنا تھا کہ بنوں ریجن پولیس نے دہشتگردی کا ڈٹ کر مقابلہ کیا ہے اور کسی بھی قربانی سے دریغ نہیں کیا ہے۔ اس واقع میں ملوث دہشتگردوں کو کیفر کردار تک پہنچا کر ہی دم لینگے۔