پاکستان سپر لیگ (پی ایس ایل) کے دسویں ایڈیشن کے بقیہ میچز کے لیے اسلام آباد یونائیٹڈ نے دو اہم غیر ملکی کھلاڑیوں، رسی وین ڈر ڈوسن اور ایلکس ہیلز، کی واپسی کی تصدیق کر دی ہے۔
فرنچائز کے مطابق جنوبی افریقہ کے باصلاحیت بیٹر رسی وین ڈر ڈوسن کی ٹیم میں شمولیت سے مجموعی معیار میں نمایاں بہتری آئے گی۔ ٹیم مینجمنٹ نے ان پر مکمل اعتماد ظاہر کرتے ہوئے انہیں جدید دور کا ایک نمایاں بیٹر قرار دیا ہے۔
دوسری جانب انگلینڈ کے سابق بیٹر ایلکس ہیلز ایک بار پھر ٹیم کا حصہ بن گئے ہیں۔ وہ اسلام آباد یونائیٹڈ کے لیے ماضی میں بھی کئی یادگار اننگز کھیل چکے ہیں اور خود کو اس فرنچائز سے جذباتی طور پر وابستہ قرار دیتے ہیں۔
ہیلز نے واپسی پر کہا کہ اسلام آباد یونائیٹڈ ان کے دل کے قریب ہے اور یہ وہ ٹیم ہے جس کے ساتھ انہوں نے پاکستان میں اپنا پہلا پی ایس ایل میچ کھیلا تھا۔ انہوں نے شائقین کی حمایت کو بھی سراہا۔
