صدر مسلم لیگ (ن) نواز شریف نے اپنے بیان میں کہا کہ پاکستان کی بہادر مسلح افواج نے پیشہ وارانہ مہارت اور عزم و حوصلے کے ساتھ سرزمین وطن کا دفاع کیا۔
نواز شریف سے چیئرمین قائمہ کمیٹی امور خارجہ عرفان صدیقی نے جاتی امرا میں ملاقات کی، جہاں انہوں نے پارلیمانی پارٹی کی کارکردگی رپورٹ پیش کی۔
اس موقع پر گفتگو کرتے ہوئے نواز شریف نے کہا کہ قومی سلامتی کے لیے سیاسی تقسیم کو پس پشت ڈال کر ایک آواز میں بولنا خوش آئند ہے۔
انہوں نے مزید کہا کہ پاکستان کی پارلیمنٹ نے مثبت اور توانا کردار ادا کیا، عوامی نمائندوں نے قوم کے جذبات کی ترجمانی کرتے ہوئے مسلح افواج کا حوصلہ بڑھایا۔
نواز شریف نے اللہ تعالیٰ کا شکر ادا کرتے ہوئے کہا کہ یہ فتح پاکستان کے لیے ایک بڑی کامیابی ہے۔
انہوں نے پاکستانی میڈیا کو بھی سراہا، جس نے سچ پر مبنی بیانیہ دنیا کے سامنے رکھا اور دشمن کے جھوٹ کو بے نقاب کیا۔
