جنوبی کوریا میں جاری ایشین ایتھلیٹکس چیمپیئن شپ میں جیولین تھرو کے ایونٹ میں پاکستان سے تعلق رکھنے والے اولمپک گولڈ میڈلسٹ ارشد ندیم نے فائنل کے لیے کوالیفائی کرلیا۔
ایشین ایتھلیٹکس چیمپئن شپ میں جیولین تھرو ایونٹ کے کوالیفائینگ راؤنڈ میں پاکستانی اولمپک گولڈ میڈلسٹ ارشد ندیم نے 86.34 میٹر کی تھرو کرکے فائنل کیلیے کوالیفائی کر لیا۔
جیولین تھرو کے کوالیفائنگ راؤنڈ میں بھارتی کھلاڑی یش نے 76.67 میٹر کی تھروکی، فائنل اکتیس مئی کو ہو گا ۔
ارشد ندیم نے مقابلے سے قبل قوم سے اپنی کامیابی کے لیے دعا کی اپیل کی تھی، انہوں نے کہا تھا کہ گزشتہ سال کے اولمپکس کے بعد یہ ان کا پہلا ٹورنامنٹ تھا، انہوں نے کہا کہ میرے لیے دعا کریں تاکہ میں فائنل کے لیے کوالیفائی کر سکوں۔
ان کا کہنا تھا کہ چیمپئن شپ کا فائنل 31 مئی کو پاکستانی وقت کے مطابق دوپہر ایک بج کر 10 منٹ پر ہو گا، انہوں نے دعا کی درخواست کی کہ وہ میڈل حاصل کر سکیں اور پاکستان کا سر فخر سے بلند کر سکیں۔
واضح رہے کہ گزشتہ سال اگست میں ارشد ندیم نے ایک نیا اولمپک ریکارڈ قائم کیا اور پیرس میں مردوں کے جیولن فائنل میں 92.97 میٹر تھرو کے ساتھ گولڈ میڈل جیتا تھا۔
