ایران میں پھنسے پاکستانیوں کی بحفاظت واپسی کے لیے پی آئی اے نے خصوصی پروازوں کا آغاز کر دیا ہے۔ پی آئی اے کا پہلا خصوصی طیارہ ترکمانستان کے دارالحکومت اشک آباد کے لیے روانہ ہو چکا ہے۔
ذرائع کے مطابق ایرانی شہر مشہد سے 150 پاکستانی شہریوں کو اشک آباد منتقل کیا گیا ہے، جہاں سے انہیں پاکستان لانے کا عمل شروع کر دیا گیا ہے۔ ایرانی فضائی حدود کی بندش کے باعث متعدد پاکستانی شہری ایران میں محصور ہو کر رہ گئے تھے۔
پاکستانی سفارت خانے کے تعاون سے ان شہریوں کو اشک آباد پہنچانے کے بعد پی آئی اے کی خصوصی پرواز انہیں وطن واپس لائے گی۔
ذرائع کے مطابق آئندہ دنوں میں مزید خصوصی پروازیں چلانے کا فیصلہ حکومتی ہدایت کے مطابق کیا جائے گا۔
