کراچی: شہر قائد کے بلدیاتی انتخابات میں الیکشن کمیشن نے 235 میں سے 205 یوسیز کے نتائج جاری کردیے جن کے مطابق پیپلز پارٹی اول، جماعت اسلامی دوسرے اور پی ٹی آئی تیسرے نمبر پر ہے۔
الیکشن کمیشن سے موصولہ غیر حتمی نتائج کے مطابق پیپلز پارٹی نے چیئرمین اور وائس چیئرمین کی 86 نشستیں حاصل کرلی ہیں۔ دوسرے نمبر پر جماعت اسلامی 68 نشستوں پر کامیاب ہوئی جب کہ تیسرے نمبر پر پی ٹی آئی ہے جس نے یوسی چیئرمین وائس چیئرمین کی 37 نشستیں حاصل کیں۔
مسلم لیگ ن 7، جے یو آئی (ف)دو، آزاد امیدوار تین، تحریک لبیک، مہاجر قومی موومنٹ ایک ایک یوسی جیتنے میں کامیاب ہوئے۔اندرون سندھ کے بیشتر اضلاع میں پیپلز پارٹی چھائی رہی اور بیشتر نشستیں حاصل کرکے سرفہرست رہی۔
بلدیاتی انتخابات کے دوران، حیدرآباد، جوہی، سیہون، ٹھٹھہ، جامشورو، خیرپور ناتھن، مٹیاری، میہڑ، دادو، سجاول، بدین میرپور ساکرو، ماتلی و دیگر اضلاع کی یونین کمیٹیوں میں پیپلزپارٹی کے امیدوار کامیاب ہوئے۔
کراچی کی طرح حیدرآباد کے بلدیاتی انتخابات کے نتائج بھی موصول ہونے کا سلسلہ جاری ہے اور وہاں بھی پیپلز پارٹی کو سبقت حاصل ہے۔ غیر حتمی و غیر سرکاری نتائج کے مطابق حیدر آباد ضلع کی تین ہزار سے ایک سو ایک نشستوں میں سے پیپلز پارٹی ایک ہزار 34 نشستیں حاصل کرکے سرفہرست ہے۔
الیکشن کمیشن کا بتانا ہے کہ شہر کی 30 نشستوں پر چیئرمین اور وائس چیئرمین کے نتائج آنا باقی ہے۔ الیکشن کمیشن کے مطابق شہر کی 246 میں سے 235 یونین کمیٹیز میں انتخابات ہوئے جبکہ 11نشستوں پر امیدواروں کے انتقال کی وجہ سے انتخابات ملتوی ہوئے۔
کراچی کے ضلع ملیر میں بھی پیپلز پارٹی نے میدان مار لیا کراچی کے ضلع ملیر کی تمام 30 یو سیز کے مکمل نتائج موصول ہوچکے ہیں۔ ضلع ملیر 3 ٹاؤن اور 30 یونین کونسلز (یو سیز)پرمشتمل ہے۔ غیر حتمی و غیر سرکاری نتائج کے مطابق ضلع ملیر میں پیپلز پارٹی 20 یو سیز پر کامیاب ہوئی۔
پی ٹی آئی ملیر سے 4 یو سیز پرکامیاب ہوئی۔ اس کے علاوہ جماعت اسلامی 3 یو سیز پر کامیاب ہوئی، مسلم لیگ ن 2 یو سیز پر کامیاب ہوئی، ایک یو سی پر آزاد امیدوار کامیاب ہوا۔ کراچی کے ضلع جنوبی کا نتیجہ مکمل کراچی کے ضلع جنوبی کے چیئرمین کا نتیجہ مکمل ہوگیا جس میں 26 میں سے 15 یونین کونسلز پر پیپلز پارٹی اور 9 پر تحریک انصاف کامیاب ہوئی ہے، ضلع جنوبی میں ایک نشست پر تحریک لبیک کا پینل منتخب ہوا اور ایک نشست پر انتخاب ملتوی ہوگیا۔
