انٹرنیشنل کرکٹ کونسل (آئی سی سی) نے ورلڈ کپ کے اختتام کے بعد ٹیم آف دی ٹورنامنٹ کا اعلان کردیا۔
اے آر وائی نیوز کے مطابق آئی سی سی کی ٹیم آف دی ٹورنامنٹ میں کوئی پاکستانی جگہ نہیں بنا سکا بھارت کے چھ کھلاڑی جگہ بنانے میں کامیاب ہوگئے۔
روہت شرما کو ٹیم کا کپتان مقرر کیا گیا ہے، ویرات کوہلی، کے ایل راہول، رویندر جڈیجا، جسپریت بمراہ اور محمد شامی شامل ہیں۔
چیمپئن ٹیم آسٹریلیا کے گلین میکسویل اور ایڈم زمپا نے ٹیم میں جگہ بنائی ہے۔
نیوزی لینڈ کے ڈیرل مچل، سری لنکا کے مدوشنکا اور جنوبی افریقہ کے کوئنٹن ڈی کوک کو گیارہ کھلاڑیوں میں شامل کیا گیا ہے۔
جنوبی افریقی آل راؤنڈر جیرالڈ کوٹزی بارہویں کھلاڑی کے طور پر منتخب کیے گئے ہیں۔
واضح رہے کہ کل آئی سی سی ورلڈ کپ کے فائنل میں آسٹریلیا نے بھارت کو باآسانی 6 وکٹوں سے شکست دے کر چھٹی بار عالمی چیمپئن بننے کا اعزاز حاصل کیا تھا۔
