اوٹاوا: کینیڈا نے 13 نئے ممالک کے شہریوں کے لیے ویزے کے بغیر داخلے کی اجازت دے دی ہے۔ ان افراد کو اب صرف ایک الیکٹرانک ٹریول آتھورائزیشن (eTA) کی ضرورت ہوگی، جو ایک آسان اور تیز رفتار آن لائن عمل کے ذریعے حاصل کی جا سکتی ہے۔
یہ اعلان کینیڈین وزیر برائے امیگریشن، مہاجرین و شہریت، شان فریزر کی جانب سے کیا گیا۔ ان کا کہنا تھا کہ اس فیصلے کا مقصد کینیڈا کے بین الاقوامی تعلقات کو مضبوط کرنا اور مسافروں کے لیے سفر کے عمل کو سہل بنانا ہے۔
جن 13 ممالک کو اس فہرست میں شامل کیا گیا ہے ان میں انٹیگوا اور باربوڈا، ارجنٹینا، کوسٹا ریکا، مراکش، پاناما، فلپائن، سینٹ کٹس اینڈ نیوس، سینٹ لوشیا، سینٹ ونسنٹ اینڈ دی گرینیڈائنز، سیشلز، تھائی لینڈ، ٹرینیڈاڈ اینڈ ٹوباگو اور یوراگوئے شامل ہیں۔
eTA حاصل کرنے کے اہل وہ مسافر ہوں گے جنہوں نے پچھلے 10 برسوں میں کینیڈین ویزا حاصل کیا ہو یا جن کے پاس امریکی نان امیگرنٹ ویزا موجود ہو۔ یہ سہولت صرف فضائی سفر کے لیے ہوگی اور مسافر زیادہ سے زیادہ چھ ماہ تک سیاحت یا کاروباری مقصد کے تحت کینیڈا میں قیام کر سکیں گے۔
درخواست کے لیے پاسپورٹ، ای میل ایڈریس، انٹرنیٹ رسائی اور کریڈٹ کارڈ درکار ہوگا جبکہ فیس صرف 7 کینیڈین ڈالر مقرر کی گئی ہے۔ بیشتر درخواستوں کی منظوری چند منٹوں میں دی جاتی ہے۔
حکومت کے مطابق یہ اقدام نہ صرف سیاحت اور تجارت کو فروغ دے گا بلکہ امیگریشن سروسز پر دباؤ کو بھی کم کرے گا۔
