بیروت: لبنان کے دارالحکومت بیروت میں ہولناک دھماکے سے 10 افراد ہلاک اور سیکڑوں زخمی ہوگئے ہیں جب کہ کئی عمارتیں اور گاڑیاں تباہ ہوگئی ہیں۔
عالمی خبر رساں ادارے کے مطابق منگل کو مقامی وقت کے مطابق شام 6 بجے کے قریب بیروت کی بندرگاہ کے علاقے میں ہولناک دھماکا ہوا جس کے نتیجے میں گردو نواح کے علاقے لرز گئے اور شہر کے مختلف علاقوں کی عمارتیں اور گاڑیاں تباہ ہوگئیں۔ برطانوی خبر ایجینسی کے مطابق تباہ ہونے والی عمارتوں میں لبنان کے سابق وزیر اعظم سعد حریری کا گھر بھی شامل ہے۔
مقامی خبرایجنسی کے مطابق دھماکا فائرکریکرزکے گودام میں آگ لگنے کے باعث ہوا جس کی آواز کئی کلومیٹر دور تک سنائی دی گئی۔ دھماکہ سے دور تک عمارتیں لرزاٹھیں۔ تاہم سرکاری سطح پر دھماکے کے سبب اور شدت کے بارے میں بیان جاری نہیں کیا گیا ہے۔
اس سے قبل لبنان کے وزیر صحت حماد حسن نے دھماکے میں سیکڑوں افراد کے زخمی ہونے کی تصدیق کی تھی۔ علاوہ ازیں دھماکے کے مقام کی قریبی عمارتوں سے لی گئی تصاویر اور ویڈٰیوز میں دھماکے کی شدت کے باعث ہونے والی تباہی اور گردو ونواح میں پھیلنے والا دھواں دیکھا جاسکتا ہے۔
