پشاور: صوبہ خیبر پختونخوا کے دارالحکومت پشاور میں دوحا سے آنے والے 30 مسافروں میں کورونا وائرس کی تصدیق ہوگئی، مسافروں کو ضلعی انتظامیہ کی مدد سے قرنطینہ کے لیے ہسپتال منتقل کر دیا گیا۔
تفصیلات کے مطابق قطر کے دارالحکومت دوحا سے پشاور پہنچنے والے 30 مسافروں میں کرونا وائرس کی تصدیق ہوگئی، مسافر نجی ایئر لائن کی پرواز سے دوحا سے پشاور پہنچے تھے۔
ذرائع کا کہنا ہے کہ پشاور ایئرپورٹ پر مسافروں کے ریپڈ ٹیسٹ کیے گئے، ریپڈ ٹیسٹ میں 30 مسافروں میں کورونا وائرس کی تشخیص ہوئی۔
مسافروں کو ضلعی انتظامیہ کی مدد سے قرنطینہ کے لیے ہسپتال منتقل کر دیا گیا۔
یاد رہے کہ ملک بھر میں کووڈ 19 کے مجموعی کیسز کی تعداد 12 لاکھ 38 ہزار 668 ہوچکی ہے، این سی او سی کا کہنا ہے کہ گزشتہ 24 گھنٹوں کے دوران کورونا وائرس کے 1 ہزار 780 نئے کیسز رپورٹ ہوئے۔
