محکمہ صحت خیبر پختونخوا نے ڈسٹرکٹ ہیلتھ آفیسرز (ڈی ایچ اوز) اور ان کے عملے سے کرپشن نہ کرنے کا حلف لینے کا فیصلہ کیا ہے۔ ذرائع کے مطابق، تمام 37 ڈی ایچ اوز کو مشیر صحت کے دفتر میں طلب کیا جائے گا، جہاں ان سے تحریری حلف نامے لیے جائیں گے۔
ذرائع کا کہنا ہے کہ حلف نامے میں واضح کیا جائے گا کہ کوئی بھی اہلکار قوم کے پیسے کو ذاتی مفاد کے لیے استعمال نہیں کرے گا اور شعبہ صحت میں بہتری کے لیے کام کرے گا۔
مشیر صحت خیبر پختونخوا نے کہا کہ محکمے میں کرپشن کسی صورت برداشت نہیں کی جائے گی اور اگر تحقیقات میں کسی بھی اہلکار پر کرپشن ثابت ہوئی تو اس کے خلاف سخت کارروائی کی جائے گی۔
انہوں نے مزید کہا کہ ڈی ایچ اوز سے یہ حلف بھی لیا جائے گا کہ وہ صحت کے شعبے میں بہتری کے لیے ہر ممکن اقدامات کریں گے۔
ذرائع کا کہنا ہے کہ یہ فیصلہ بانی پی ٹی آئی کی جانب سے خیبر پختونخوا کو کرپشن سے پاک کرنے کی ہدایت کے بعد کیا گیا ہے، جس کے تحت محکمہ صحت میں شفافیت یقینی بنانے کے لیے اقدامات کیے جا رہے ہیں۔
