فلوریڈا کے شہر اورلینڈو میں حیرت انگیز واقعہ پیش آیا جہاں ایک شخص نے گرفتاری سے بچنے کے لیے 21 کروڑ 25 لاکھ روپے مالیت کے ہیرے نگل لیے۔
رپورٹس کے مطابق 32 سالہ جیتھن لارنس گلائیڈر نے 26 فروری کو ایک شاپنگ مال سے قیمتی ہیرے کی بالیوں کے دو جوڑے چرائے اور فرار ہو گیا۔ پولیس نے تعاقب کرکے اسے گرفتار کر لیا، مگر اس کے قبضے سے کچھ برآمد نہ ہوا۔
تفتیش کے دوران جیتھن نے عجیب سوال کیا: "کیا مجھے میرے پیٹ میں موجود کسی چیز کی وجہ سے گرفتار کیا جائے گا؟" جس کے بعد پولیس نے اس کا ایکسرے کروایا۔
ایکسرے سے پتہ چلا کہ جیتھن کے نظامِ ہاضمہ میں کوئی چیز موجود ہے، جس پر پولیس کو شبہ ہوا کہ یہ وہی چوری شدہ ہیرے ہیں۔ اب حکام ملزم کے جسم سے وہ قیمتی ہیرے قدرتی طریقے سے برآمد کرنے کا انتظام کر رہے ہیں، جبکہ جیتھن پولیس کی تحویل میں ہے۔
