اسلام آباد:محکمہ موسمیات نے ملک بھر میں نئے سسٹم کے تحت بارشوں کی پیش گوئی کر دی،محکمہ موسمیات کی جانب سے جاری بیان کے مطابق منگل 28فروری سے جمعرات 2 مارچ تک بالائی اور وسطی علاقوں میں بارش کا امکان ہے۔
میٹ آفس کے مطابق اس دوران بالائی اور وسطی علاقوں میں تیز ہواؤں اور گرج چمک کے ساتھ بارش کی توقع ہے،جاری بیان کے مطابق اسلام آباد میں اس دوران پہاڑوں پر برفباری کا بھی امکان ہے۔
محکمے کی اطلاعات کے مطابق مغربی ہوائیں 28فروری کو ملک کے مغربی علاقوں میں داخل ہونگی۔ مغربی ہوائیں مارچ کو ملک کے بالائی اور وسطی علاقوں میں پھیل جائیں گی۔
رپورٹ کے مطابق 28فروری سے 2مارچ تک مری میں بھی تیز ہواؤں کے ساتھ بارش اور برفباری کا امکان ظاہر کیا گیا ہے۔
گلیات، آزاد کشمیر، گلگت بلتستان میں بھی تیز ہوا کے ساتھ بارش اور برفباری ہوسکتی ہے،نئے سسٹم کے تحت اسلام آباد سمیت خطہ پوٹھوہار، گجرانوالہ میں گرج چمک کے ساتھ بارش ہوگی۔
اس موقع پر محکمہ موسمیات کی جانب سے تمام متعلقہ اداروں کو الرٹ جاری کردیا گیا ہے۔
