رواں سال کے دوران اب تک 1,100 سے زائد تارکینِ وطن چھوٹی کشتیوں کے ذریعے انگلش چینل عبور کر کے برطانیہ پہنچ گئے، جو 2025 کا نیا ریکارڈ ہے۔
سرکاری اعدادوشمار کے مطابق، کل 1,194 افراد نے صرف ایک دن میں چینل عبور کیا، جس سے رواں سال اب تک برطانیہ پہنچنے والے تارکین وطن کی تعداد 14,808 ہو گئی ہے۔ یہ تعداد پچھلے سالوں کے مقابلے میں کہیں زیادہ ہے۔
فرانسیسی حکام کے مطابق جمعے اور ہفتے کے درمیان 200 کے قریب افراد کو بچایا گیا۔
برطانوی وزیر دفاع جان ہیلی نے ان اعداد و شمار کو "چونکا دینے والا" قرار دیا ہے۔ برطانیہ کے وزیراعظم کئیر اسٹارمر پہلے ہی تارکین وطن سے متعلق سخت پالیسیاں متعارف کرا چکے ہیں، جن میں ملک میں رہائش کی مدت بڑھانا اور غیر ملکی مجرموں کی فوری ملک بدری شامل ہے۔
ہوم آفس کے مطابق، "ہم سب خطرناک چھوٹی کشتیوں کے سفر کو روکنا چاہتے ہیں جو انسانی جانوں اور بارڈر سیکیورٹی کے لیے خطرہ ہیں۔"
برطانیہ میں اس وقت بارڈر سیکیورٹی، اسائلم اور امیگریشن بل پارلیمنٹ سے منظوری کے مراحل میں ہے۔
