کوئٹہ کے علاقے سریاب روڈ پر پیپلزپارٹی کے رکنِ صوبائی اسمبلی علی مدد جتک کے قافلے کے قریب دھماکے سے ایک شخص جاں بحق جبکہ 10 افراد زخمی ہو گئے۔
پولیس کے مطابق دھماکے کے وقت علی مدد جتک پاکستان کی بھارت کے خلاف فتح کے موقع پر ہاکی گراؤنڈ میں منعقدہ تقریب میں شرکت کے لیے ریلی کی صورت میں جا رہے تھے۔ دھماکے میں وہ خود محفوظ رہے۔
زخمیوں کو فوری طور پر سول اسپتال کوئٹہ کے ایمرجنسی وارڈ میں منتقل کیا گیا جہاں انہیں ابتدائی طبی امداد دینے کے بعد ٹراما سینٹر منتقل کر دیا گیا ہے۔
پولیس اور سیکیورٹی اداروں نے علاقے کو گھیرے میں لے کر تفتیش کا آغاز کر دیا ہے۔ دوسری جانب ہاکی گراؤنڈ میں سیکیورٹی مزید سخت کر دی گئی ہے تاکہ تقریب میں شریک افراد کی حفاظت یقینی بنائی جا سکے۔
