گلگت بلتستان کے ضلع گھانچے میں نامعلوم چوٹی کو سر کرنے کی کوشش کے دوران ایک جاپانی کوہ پیما ہلاک اور دوسرا زخمی ہوگیا۔
زخمی کوہ پیما کو پاک فوج کے ہیلی کاپٹروں کے ذریعے اسکردو لے جایا گیا ہے۔
گھانچے کے ڈپٹی کمشنر عمر وقارکے مطابق کہ جاپان سے تعلق رکھنے والے 2 کوہ پیما تمورا شنجی اور سامبا تاکیاسو ضلع گھانچے کی وادی کندے میں واقع 6ہزار 800 میٹر بلند چوٹی سر کرنے کی کوشش کر رہے تھے، چڑھائی کے دوران دونوں کوہ پیما رسی سے پھسل کر 5ہزار 300 میٹر کی بلندی سے گر کر زخمی ہو گئے۔
ان دونوں کے علاوہ ایک اور کوہ پیما نامعلوم چوٹی پر چڑھنے کی کوشش کے دوران زخمی ہو گیا۔
ہشی ویلی کے تجربہ کار کوہ پیماؤں پر مشتمل ایک ریسکیو ٹیم کو پھنسے ہوئے کوہ پیما کی مدد کے لیے روانہ کیا گیا، علاقے میں تلاشی کے باوجود وہ اسے ڈھونڈنے میں میں ناکام رہے، یہ خدشہ ظاہر کیا جاتا ہے کہ وہ رات کو اترائی کے دوران کسی شگاف میں گر گیا ہوگا۔
مہم کے منتظم نے تصدیق کی کہ بیس کیمپ میں سامبا تاکیاسو کی حالت پہلے سے بہتر ہے اُور زندہ بچ جانے والے کوہ پیما نے ہلاک ہونے والے کوہ پیما کے اہل خانہ کو اس واقعے سے آگاہ کر دیا گیا ہے۔
